DILI, (TATOLI) – Prokuradoria Jerál Repúblika (PJR) no Komisaun Funsaun Públika (KFP), ohin asina nota entendimentu (MoU-sigla inglés) hodi kria kordenasaun ba desizaun judisiál hasoru funsionáriu públiku, prevene no kombate kazu asédiu seksuál, formasaun ba investigadór sira atu hadi’a integridade Estadu no funsaun públika ida ho efikás.
Prezidente KFP, Faustino Cardoso, hateten nota ne’e atu fahe informasaun, dokumentu ne’ebé ligadu ho prosesu indisiplinár administrativu no krime ne’ebé involve funsionáriu públiku.
“Ami mós buka atu servisu hamutuk iha ámbitu atu hatan ba rekursu kontenjiozu sira bainhira funsionáriu públiku ida la satisfas ho desizaun komisaun públika iha aktu disiplinár, sira iha diretu atu rekore ba ministériu públiku”, hateten Cardoso ba jornalista sira iha edifísiu PJR Kolmera.
KFP prontu fornese informasaun, dokumentu no marka prezensa hodi sai testamuña bainhira hala’o julgamentu ba funsionáriu públiku ne’ebé involve iha kazu krime kontenjiozu.
Prokuradór Jerál Repúblika, José Ximenes, hateten servisu hamutuk ne’e la’o ona, maibé ohin asina hodi formaliza instituisaun rua ne’e.
Entretantu MoU ne’e la determina tempu, maibé depende ba desizaun hosi insituisaun rua ne’e bainhira laiha ona nesesidade.
Jornalista: Agapito dos Santos
Editora: Rita Almeida
