Ohin, PN Hahú Diskusaun No Votasaun Jeneralidade Proposta Lei OJE 2018

0
282
Membru Parlamentu Nasional. Imajen/dok.TATOLI

DILI (TATOLI) – Parlamentu Nasionál (PN), ohin liuhosi reuniaun plenária, sei hahú diskusaun no votasaun jeneralidade Proposta Lei nú 2/V (1a) Orsamentu Jerál Estadu (OJE) 2018 no tuir ajenda abertura sei hahú iha tuku 16.00.

Antes ne’e, Komisaun C ne’ebé trata asuntu Finansas Públikas realiza ona apresiasaun inisiál durante loron lima, hahú husi 15 to’o 21 Agostu no konvida entidade responsavel sira.

Proposta Lei ne’e, sei debate jeneralidade no espesialidade hahú husi loron 27 Agostu to’o 7 Setembru.

Entretantu, OJE 2018 engloba ona ho Orsamentu Estadu (OE) no Orsamentu Seguransa Sosiál (OSS) ne’ebé diskrimina reseitas no despezas Estadu hotu, inklui Seguransa Sosiál ba tinan finanseiru 2018.

Enkuantu estimativa ba reseitas ne’ebé kobre no finansiamentu despeza OJE 2018, sei mai husi fontes hotu hanesan petrolíferu no noun petrolíferu (fiskais, noun fiskais no husi impresizu) husi totál estimada reseitas US$ 850,3 millions.

Reseitas noun petrolíferu estimada, inklui ona ho servisu no fundu autónomu sira ne’ebé hamutuk US$ 188,8 millions, no US$ 5,6 millions korresponde ba totál reseitas ne’ebé kobre husi servisu no fundu autónomu sira, inklui RAEOA no ZEEMS.

Totál estimadu ba despezas OJE hamutuk US$ 1.279,599 millions, Dotasaun Orsamentál ba tinan 2018, ba Salárius no Vensimentus US$ 200,312 millions, Bens no Servisus US$ 421,666 millions, Transferénsia Públikas US$ 261,925 millions, Kapitál Menór US$ 3,659 millions, kapitál Dezenvolvimentu US$ 392,037.

Antes ne’e Diretór Jerál Finansas Estadu mós hatete tetu orsamentál ne’ebé sei aplika ba Orsamentu Jerál Estadu 2018 mak billion 1.218 ne’ebé kompara ho tetu agregadu 2017 nian iha redusaun porsentu 5.2.

“Husi tetu ida ne’e ita distribui ba saláriu no vensimentu iha millaun 205.7, kategoria bens no servisu millaun 400 resin, kategoria transferénsia públika millaun 238 no kapitál dezenvolvimentu millaun 323”, nia esplika.

Hatán kona-bá kapitál menór tanba haree ba tetu ba períodu prosesu aprovizionamentu ne’e rasik Governu liuhusi Konsellu Ministru deside para tau de’it rezerva plafond balun para bele hatán estrutura foun no nesesidade urjente ne’ebé labele adia ba tinan oin. Ho ida ne’e, iha tinan 2017 ne’e millaun 12, agora hatún ba miliaun 3.

Jornalista: Julia Chatarina

Editór : Manuel Pinto

HUSIK IDA HATÁN