Ministru Mak Bele Defende OJE Iha PN

0
203
Prezidente Parlamentu Nasionál (PPN), Arão Noé de Jesus. Foto Xisto Freitas

DILI, (TATOLI) – Prezidente Parlamentu Nasionál, Arão Noé de Jesus, hateten regra Parlamentu Nasionál (PN) nian, ema polítiku ka ministru maka bele hatan ba pergunta-sira iha debate Orsamentu Jerál Estadu (OJE), labele hosi funsionáriu ka tékniku-sira.

Arão hato’o asuntu ne’e ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho regra diskusaun OJE iha PN.

Tuir nia estrutura Governu seidauk kompletu ne’e bele afeta ba audiénsia OJE, tanba atu defende orsamentu ka programa ministériu ninian ne’e tenke ministru-sira.

“Primeiru-Ministru bele halo akumulasaun maibé problema maka kada ministériu iha ninia programa rasik, maibé tanba haree ba preokupasaun Estadu nian, entaun prosesu ne’e ami la’o nafatin hodi hein prosesu sira seluk, liu-liu kompleta estrutura Governu no Lei Orgániku Governu”, afirma Arão.

Nia haktuir proposta Lei OJE 2018 nian Governu hato’o ona ba PN no tuir kalendáriu, ohin (kuarta ne’e), hahú audiénsia iha komisaun-sira.

Arão tenik tuir planu debate OJE ba jeneralidade iha 28 agustu no debate ba espesialidade iha 31 agustu no sei haruka ba Prezidente-Repúblika atu promulga iha 7 setembru.

“Tuir kalendáriu ne’ebé Komisaun C fiksa, lori ba Prezidente-Repúblika tarde liu maka to’o 10 setembru”, tenik.

Jornalista: Xisto Freitas

Editora: Rita Almeida

HUSIK IDA HATÁN