Maske Féria Judisiál, MP Kontinua Atende Kazu Urjente

0
74
Prokuradór Jerál Repúblika, José da Costa Ximenes

DILI (TATOLI)—Prokuradór Jerál Repúblika, José da Costa Ximenes, informa ba Prezidente-Repúblika (PR) kona-ba féria judisiál ne’ebé hahú tiha ona iha 1 Agustu-15 Setembru 2018, maibé la afeta ba atendementu kazu urjente sira.

“Aproveita féria judisiál ne’e, Ministériu Públiku (MP) nafatin funsiona serbisu turnu atu haree, primeiru, atende kazu urjente sira kona-ba primeiru interrogatóriu, kazu arguidu detidu sira no julgamentu sumáriu sira,” Ximenes hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin hala’o enkontru regulár ho Xefe-Estadu Lú Olo.

Nia hatutan, iha féria judisiál ne’e mós prokuradór sira halo sira nia jestaun atu haree objetu ba krime sira, pur-ezemplu, prosesu arkiva tiha ona, oinsá prokuradór sira organiza para haree kestaun sira ne’e.

Aleinde ne’e, Ximenes mós hato’o ba PR katak Prokuradoria Jerál Repúblika (PJR) iha 31 Jullu dezloka ona ba Parlamentu Nasionál (PN) hodi relata informasaun anuál, tanba ne’e hanesan devér ida ne’ebé konsagra ona iha Konstituisaun no Lei.

“Ultima informasaun ne’ebé PJR informa ba Prezidente-Repúblika maka PJR ho Komisaun Funsaun Públika (KFP) selebra ona nota intendementu ida ne’ebé ko’alia kona-ba kooperasaun institusionál, iha ne’ebé koloka pontus tolu maka hanesan, primeiru, formaliza kooperasaun ho KFP atu haree krime sira ne’ebé akontese iha KFP nia ezersísiu. Segundu, atu haree krime estrañu sira ne’ebé funsionáriu públiku sira involve. Terseiru, prosesu sivíl sira ne’ebé tama iha MP,  MP nu’udar reprezentante ba prosesu sivíl sira ne’e iha tribunál ,” Prokuradór Jerál esklarese.

Iha biban ne’e, nia haktuir, Prezidente-Repúblika fó apoiu totál ba setór justisa nia serbisu no husu nafatin ba setór justisa kumpri didi’ak lei no prinsípiu sira ne’ebé konsagra iha Konstituisaun.

Jornalista: Xisto Freitas

Editór : Manuel Pinto

HUSIK IDA HATÁN