Livru Pensamentu Nicolau Lobato Sei Lansa Tinan Ne’e

0
250
Pe. Martinho aprezenta livru pensamentu Nicolau Lobato

DILI, (TATOLI) – Profesór Filozofia Étika ba Institutu Superiór Filozofia  (ISFIT) Don Jaime Goulart Fatumeta, Padre Martinho Gusmão, sei lansa ninia livru kona-ba pensamentu Prezidente Nicolau Lobato, ho títulu “Sabemos e Podemos, e Devemos Vencer”.

Livru ho pájina hamutuk 534 ne’e ba dahuluk hakerek ho versaun portugés no posibilidade tinan oin sei tradús ba tetun.

“Ba ha’u, livru ida ne’e hanesan monumentu ida. Katak, ita halo estrada, ita halo sentru formasaun, aeruportu no estátua depois ita la komprende Nicolau Lobato ne’e sé no oinsá, entaun livru ida ne’e halo katak ita tama iha ninia ulun laran no fuan laran”, hakerek nain ba livru ne’e, Amu Martinho, ba jornalista sira iha Palásiu Prezidente Nicolau Lobato, Bairru Pité, sesta ne’e, hafoin hasoru Prezidente Repúblika, Francisco Guterres Lú Olo, kona-ba lansamentu livru refere.

Nia esplika en-prinsípiu livru ne’e ko’alia kona-ba fundamentu filozófiku oinsá Nicolau Lobato ho nia maluk sira harii nasaun.

“Ita hatene katak tinan 1974-1978, pozisaun ofisiál hosi Portugal iha rua ba destinu Timor-Leste maka federalizmu no integrasionizmu. Federalizmu ba Áfrika no integrasaun ba Ázia, entaun mosu ema ‘bulak’ sira hanesan Nicolau Lobato, Xavier do Amaral, Borja da Costa, Marí Alkatiri, Justinho Mota no Ramos Horta, hodi kontra pozisaun ofisiál refere”, eis Pároku Parókia Manatuto haktuir.

Leigu ne’e hatutan livru ne’e mós iha artigu ka pensamentu hamutuk 14 hosi Nicolau Lobato kona-ba konseitu povu Maubere, konseitu Maubere, konseitu ukun rasik án, iha debate kona-ba barlake nomós poezia hosi Borja da Costa kona-ba libertasaun povu Maubere.

Nia informa lansamentu livru ne’e sei hala’o iha tinan ne’e, maibé tempu ba lansamentu ninian Prezidente Repúblika maka sei determina.

“Tinan ida ne’e, Nicolau Lobato nia tinan mate ba 40. Entaun, ohin ha’u hala’o enkontru ho Prezidente Repúblika oinsá maka iha komemorasaun tinan 40 ne’e halo selebrasaun ida signifikativu atu husik hela ba jerasaun foun”, katak.

Nia salienta Prezidente Repúblika fó ninia apoiu tomak katak ho reflesaun iha Nicolau Lobato nia tinan mate bele hetan valór ne’ebé serve ba jerasaun ida ne’e atu haree ba Estadu ohin loron.

Nia dehan ba Xefe Estadu katak jerasaun ohin loron nian presiza edukasaun polítika, tanba timoroan barak lakon edukasaun polítika.

“Ha’u hanoin ita presiza aprende pensamentu hosi Nicolau Lobato atu iha jerasaun foun ne’e labele ko’alia konforme ninia hakarak”, tenik.

Livru ne’e, Amu Martinho hateten hakerek hahú iha 2015 liu-ba no peskiza durante tinan tolu no salienta mós katak Prezidente Repúblika disponível hakerek liafuan ruma iha introdusaun livru ne’e.

Jornalista: Xisto Freitas

Editora: Rita Almeida

HUSIK IDA HATÁN