Komisaun Investigasaun Konjunta Imprimi Ona Relatóriu Kazu Maliana

0
61
Komandante Jerál Polísia Nasionál Timor-Leste (PNTL), Júlio da Costa Hornay

DILI, (TATOLI) – Komisaun Investigasaun Konjunta imprimi ona relatóriu kazu insidente entre oknum PNTL no FALINTIL-Forsa Defeza Timor-Leste (F-FDTL) ne’ebé akontese iha Maliana, munisípiu Bobonaro, 4 agustu liu-ba.

Informasaun ne’e hato’o hosi Komandante Jerál Polísia Nasionál Timor-Leste (PNTL), Júlio da Costa Hornay, ba jornalista sira iha Palásiu Prezidente Nicolau Lobato, Bairru Pité, kinta ne’e, hafoin enkontru ho Prezidente Repúblika, Francisco Guterres Lú Olo, kona-ba situasaun seguransa rai laran.

Hornay dehan relatóriu ne’e Komisaun Investigasaun Konjunta entrega ona ba komandu rua (PNTL no F-FDTL) atu estuda molok foti sansaun sensitivu ba oknum forsa rua ne’ebé komete insidente refere.

“Lee tiha lai relatóriu maka ita haree sira viola saida. Katak, atetudi ne’ebé sira hatudu ne’e viola saida. Pena ne’e sei tuir ida ne’e”, Komandante Jerál ne’e afirma.

Antes ne’e, Xefe Estadu Maior Jenerál F-FDTL, Lere Anan Timur, hateten hafoin akontese insidente Maliana, komandu F-FDTL foti inisiativa hodi detein kedas komandante F-FDTL postu Tunubibi (Maliana) iha sela Polísia Militár hodi hein investigasaun.

Majór Jenerál ne’e mós informa komandu instituisaun rua (PNTL no F-FDTL) mós sei dezloka ba Maliana hodi hato’o deskulpa ba komunidade ne’ebé afetadu ba hahalok oknum instituisaun rua ne’e.

Jornalista: Xisto Freitas

Editora: Rita Almeida

HUSIK IDA HATÁN