Kazu Maliana Ne’e Insidente De’it

0
128
Komandante Jerál Polísia Nasionál Timor-Leste (PNTL), Júlio da Costa Hornay

DILI (TATOLI)—Komandante Jerál Polísia Nasionál Timor-Leste (PNTL), Júlio da Costa Hornay hateten kazu Maliana ne’e insidente de’it maibé la’ós pur motivu entre membru PNTL no FALINTIL-Forsa Defeza Timor-Leste (F-FDTL) tanba instituisaun rua laiha problema.

“Ita nia pergunta maka kazu ne’e komandu foti desizaun oinsá. Medida disiplina oinsá. Ida ne’e maka importante ba públiku atu intende. Ami foti medidas ona. Investigasaun hosi Komisaun Konjunta ne’e maka sei rezulta desizaun ida ne’ebé forte liu,” Hornay hato’o informasaun ne’e ba jornalista sira iha Palásiu Prezidente Nicolau Lobato, Bairru Pité Dili, kinta ne’e, hafoin soru-mutu ho Xefe-Estadu, Francisco Guterres Lú Olo, kona-ba kazu Maliana.

Nia dehan, Komisaun Investigasaun Konjunta nia alvu investigasaun ba membru Batallaun Órden Públika no Task Force inklui membru F-FDTL ne’ebé iha momentu ne’ebá involve iha akontesementu bainhira halo seguransa ba Konsertu Festival Bintang iha Maliana, Munisípiu Bobonaro, sábadu (4/8).

Hornay afirma katak bainhira rekolla hotu informasaun sira hosi Komisaun Investigasaun maka instituisaun rua foin foti medidas ne’ebé klaru no labele foti medidas uluk sein dadus sira ne’ebé feitu ba membru hirak ne’e.

Komandante Jerál realsa katak uza árma ne’e lei fó dalan maibé iha ninia regra, katak, bainhira iha oportunu bele uza no labele uza bainhira la oportunu no kuandu uza árma la tuir dalan sei hetan konsekuénsia boot.

Iha oportunidade ne’e, nia haktuir, Prezidente-Repúblika mós ezije atu fó sansaun ne’ebé todan ba membru hirak refere kuandu prova komete kazu ne’e.

Jornalista: Xisto Freitas

Editór : Manuel Pinto

 

HUSIK IDA HATÁN