Kazu Maliana, F-FDTL Detein Ona Komandante Postu Tunubibi

1
573
Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, orienta detein ona komandante ida ne’ebé komanda postu F-FDTL iha Tunubibi, Maliana, relasiona ho disturbasaun entre oknum PNTL no F-FDTL iha Maliana vila, munisípiu Bobonaro, foin lalais ne’e.

Lere hateten, oras ne’e, komandante refere iha ona sela Polísia Militár durante oras 72 nia laran.

“Normalmente kastigu oras 72 nia laran, maibé ha’u dehan ema ida la interven ha’u nia desizaun. Nia bele detein liu oras 72 nia laran to’o prosesu remata”, afirma Lere ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin enkontru ho Prezidente-Repúblika, Francisco Guterres Lú Olo.

Ulun boot forsa ne’e hatutan: “Komandante tenke responsabiliza, purke ha’u rona dehan iha lanu no tiru. Ida ne’e ita labele admite iha instituisaun. Tuir regra militár nian katak militár labele hemu tua sai lanu. Tanba ida ne’e maka grave”.

Aleinde ne’e, prosesu investigasaun ba kazu refere mós la’o dadauk, iha ne’ebé hala’o hosi ekipa konjunta ida ne’ebé formadu hosi jurista-sira no instituisaun rua (F-FDTL no PNTL) mós halo investigasaun internamente ba ida-idak nia ema para to’o iha verasidade (sé maka loos no sé maka sala).

Iha biban ne’e, Lere lori instituisaun F-FDTL nia naran hato’o diskulpa ba komunidade, liu-liu Maliana oan ne’ebé pániku ho problema ne’ebé hamosu hosi oknum Polísia Nasionál Timor-Leste (PNTL) no F-FDTL.

“Ho sala ida ne’e, nu’udar komandante, ha’u husu diskulpa ba ita nia komunidade katak la’ós ema seluk maka komete sala, maibé imi-nia oan sira maka halo sala no ami sei buka hanorin ka eduka atu sai oan di’ak no militár ne’ebé profisionál”, afirma.

Lere dezmente informasaun ne’ebé dehan PNTL ho F-FDTL tiru malu no hatutan bainhira tiru malu ema ruma tenke mate, maibé realidade kanek laiha no mate mós laiha.

“Kerdizer la tiru malu. Iha ne’ebá ne’e sira halo de’it jeitu para halo ta’uk ema. Ha’u hanoin katak ne’e la’ós situasaun ida ne’ebé boot no la’ós ameasa. Maibé, primeiru lugár, sein dúvida katak situasaun ne’ebá ne’e bele halo ita nia populasaun ta’uk”, rekoñese.

Tuir nia hahalok membru F-FDTL no PNTL ne’e hakat liu regra empeñamentu forsa ne’ebé maka komandu fó ba sira.

Jornalista: Xisto Freitas

Editora: Rita Almeida

1 COMMENT

HUSIK IDA HATÁN