Janeiru-Agostu Ikan Kuaze Tonelada 4000 Lakon Iha Tasi Timór

0
107
Ikan. Foto/Google.

DILI, (TATOLI) – Diretór Jerál Peska Ministériu Agrikultura no Peska, Acácio Guterres, hatete husi janeiru to’o agostu 2018 Timor-Leste lakon rekursu ikan iha tasi Timór kuaze tonelada 4000, bainhira konverte ba osan pur volta millaun $236.

“Karik to’o dezembru tinan ida ne’e ita lakon mais de millaun 250 ita-nia rekursu ne’ebé lakon iha tasi Timór”, Acácio subliña ohin, via telemovel.

Tanba ne’e urjentemente presiza kombate peska ilegál no diresaun jerál peska mós ko’alia ona ho Ministru Agrikultura no Peska atu hato’o ba nivel másimu atu rezolve, tanba daudaun ne’e iha ró boot ida ne’ebé hakail ikan iha parte entre Iliomar (Lautein) no Watukarabou (Vikeke).

“Ró ne’e mai kuaze fulan rua ona iha ne’ebá no la’ós mai mesak, maibé iha mós ró ki’ik 10 hanesan ne’e, sira kalan-kalan peska hela besik loos iha tasi-ibun lato’o kolómetru rua ka tolu. Kalan mak ka’er, kuandu loron ona ne’e ró ki’ik sira sees tiha ba tasi-laran, hela ró boot de’it. Ne’e hanesan preokupasaun ba ita no tenta para rezolve, maibé atu rezolve ita-nia meiu laiha para atu bá kontrola. Tanba ne’e presiza serbisu konjuntu”, nia akresenta.

Acácio afirma tanba ró ne’e bele haree de’it ho matan, nune’e abitante sira iha ne’ebá mós husu atu rezolve ida ne’e, enkuantu laiha ekipamentu. Ida nune’e sai difikuldade boot ba país ne’e atu kombate peska ilegál.

“To’o ohin loron laiha dalan seluk atu rezolve ida ne’e. So husi parte komponente navál ho marítima mak iha meiu, mas depois kontaktu ho sira dehan ró ne’e mós ki’ikoan liu no laiha baze apoiu ruma iha parte súl, ne’ebé difisil atu mobiliza sira-nia ró ne’e bá parte ne’ebá”.

Tuir monitorizasaun liuhusi satélite kada ró iha hela de’it tasi Timór no balun sai husi Bali-Indonézia mak mai haka’er ikan.

Jornalista: Maria Auxilidora

Editora: Rita Almeida

HUSIK IDA HATÁN