Governu Diskute  Implementasaun Rejime Kontributivu Seguransa Sosiál

0
262
Palásiu Governu. Foto google

DILI, (TATOLI) – Primeiru-Ministru, Taur Matan Ruak, hamutuk ho Ministra Solidaridade Sosiál no Inkluzaun, Armanda Berta dos Santos, Vise Ministra Finansa, Sara Brites Lobo, ho sira seluk, ohin halo diskusaun kona-ba prosesu implementasaun rejime kontributivu seguransa sosiál ba sétor públiku no privadu.

Eis Prezidente Repúblika, Taur Matan Ruak, promulga ona lei númeru 12/2016, 14 de novembru kona-ba rejime kontributiva seguransa sosiál iha maiu 2017.

Vise Ministra Finansa, Sara Brites Lobo, hateten diskusaun ne’e atu hahú implementa ho orsamentu jerál Estadu 2018.

ʺSetór privadu kontribui hela, maibé hosi parte Governu maka seidauk implementa pursentu 100, tanba situasaun orsamentuʺ, haktuir governante ne’e ba jornalista sira iha Palasíu Governu, ohin.

Tuir dekretu governu númeru 12/2016, 14 de Novembru, regula traballadór sei kontribui pursentu haat no entidadade empregadór kontribui pursentu neen ne’ebé sei jere hosi Ministériu Solidariedade Sosiál no Inkluzaun.

ʺKontribuisaun hosi empregadór pursentu neen ne’e loos ona maibé diskute hela maka ida pursentu haat hosi traballadór siraʺ, tenik.

Entretantu seguransa sosiál nu’udár direitu umanu fundamentál tuir deklarasaun universál ba  direitu umanu iha artigu 24.

Liuhusi deklarasaun ne’e, Estadu Timor-Leste konsagra kedas direitu ne’e iha Konstituisaun Repúblika Demokrátika Timor-Leste (RDTL) artigu 56 ne’ebé iha pontu ida hateten sidadaun hotu-hotu iha direitu ba seguransa no asisténsia sosiál tuir lei no kna’ar Estadu nian.

Jornalista: Agapito dos Santos

Editora: Rita Almeida

HUSIK IDA HATÁN