Estrutura CONTL Informa Sea Games Ba PR

0
64
Estrutura CONTL hasai foto hamutuk ho Prezidente-Repúblika, Francisco Guterres Lú Olo, hafoin enkontru ramata. Imajen Mídia PR

DILI, (TATOLI) – Estrutura Komité Olímpiku Nasionál Timor-Leste (CONTL-sigla portugés), enkontru ho Prezidente-Repúblika (PR), Francisco Guterres Lú Olo, hodi ko’alia preparasaun delegasaun Timor-Leste atu partisipa Sea Games iha Indonézia.

Soru-mutu ne’ebé hala’o iha Palásiu Prezidente Nicolau Lobato, Bairru Pité, tersa ne’e, lidera hosi Vise Prezidente CONTL, Mateus da Cruz.

Mateus da Cruz hateten delegasaun hasoru hela difikuldade orsamentu atu desloka atleta maske tempu besik ona. “Ohin Prezidente-Repúblika fó sai katak iha tempu badak bele rezolve situasaun ne’e”, haktuir.

Atleta nasionál hamutuk 80 hosi modalidade 12 maka sei aranka ba Indonézia iha 16 agustu, maibé atleta Federasaun Futeból sei aranka uluk iha 11 agustu, tanba sei kompete uluk ho ekipa nasionál Xina iha Bandung, loron 14 fulan-agustu.

Molok dezloka, Prezidente-Repúblika sei entrega bandeira RDTL ba Xefe Misaun nu’udar símbolu reprezenta nasaun RDTL. Kontijente sei fahe ba Jakarta, Palembang no Bandung.

Modalidade 12 ne’ebé partisipa Sea Games maka Taekwondo, Karatedo, Boxing, Silat, Natasaun, Halterofelizmu, Tiru, Siklizmu, Atletizmu, Futeból, Voli Praia no Tenis Kampu.

Jornalista: Xisto Freitas

Editora: Rita Almeida

HUSIK IDA HATÁN