ESHANA La’o Ain Presta Omenajen ba FALINTIL

0
67
ESHANA presta omenajen ba FALINTIL. Foto TATOLI: Rafy Belo

DÍLI, (TATOLI)-Estudante Hadomi Natureza (ESHANA), ne’ebé kompostu maioria husi Estudante Universidade Nasionál Timor Lorosa’e (UNTL), Fakuldade Ekonomia no Jestaun (FEJ) sei presta omenajen ba luta FALINTIL (Força Armada Libertação Nacional Timor-Leste) ho la’o ain.

La’o ain ho tema “Os espiritos das FALINTIL ensinam-nos a ser um verdadeiro heroi da nação” ka Ho Espiritu FALINTIL sira nian hodi Hanorin Ami Sai Éroi Loloos ba Nasaun  ne’e, sei hahú husi Mirtutu, Gleno, Railako, Tarasu, Fatisi no to’o hikas Díli.

Inklui, hodi komemora loron FALINTIL nian, ne’ebé anualmente komemora iha 20 agostu. “Nu’udar joven ita tenke no labele haluha tempu ne’ebá,” dehan xefe komisaun organizadora eventu 20 agostu, loron FALINTIL nian, husi ESHANA, Jaimé da Graça ba jornalista sira iha kampus resende, UNTL, Díli, ohin.

Xefe komisaun ne’e konsidera katak joven sira dalabarak abandona aan rasik hodi haluha éroi istóriku no aswa’in sira-nia kontribuisaun ba luta hodi hetan independénsia Timor-Leste.

“Entaun ami joven, estudante hadomi natureza, ho atividade ne’e, hanesan liamenon ida ba sira hotu, iha situasaun ne’ebé ita hasoru, atu labele iha problema ruma. Mai ita hamutuk banati tuir ita-nia eroi sira hodi dezenvolve!,” afirma xefe komisaun organizadora ne’e.

Xefe Jaimé da Graça mós informa mós katak durante aventura, ESHANA sei transmite mós mensajen pozitiva sira ba komunidade, oinsa atu kontribui di’ak liutan ba prosesu dezenvolvimentu.

“Ami sei transmite kona-ba dalan. Iha ne’ebá, fatin atraidu barak ba setór turizmu. Ita hotu hatene iha Ermera, iha Nino Conis Santana nia fatin (abrigu), iha fatin ne’ebé mak famozu no istóriku tebes, maibé problema mak iha dalan. Ami sei ko’alia ba komunidade oinsa atu bele fó dalan,” haktuir estudante UNTL ne’e.

Iha abertura ba atividade ne’e, dekanu FEJ-UNTL, Fernando Baptista Anuno hateten perante aventureiru ESHANA sira ne’e katak ita-nia luta na’in sira, eroi ba iha libertasaun, agora ita tenke sai fali eroi ba prosesu dezenvolvimentu.

“Jornada ida ne’e, jornada sientífika. Tanba primeiru ita-boot sira (ESHANA) estudante, segundu haree ba prinsípiu universidade i ita-boot sira konsege hela prinsípiu rua; ida mak ensinu aprendijazen, segundu hanesan dalan ba peskiza,” dehan dekanu, Fernando Baptista Anuno.

Prezidente Grupu Juventude Voluntáriu, Custódio da Costa, ne’ebé apoiu másimu mós iha atividade ESHANA ne’e fó hanoin ba voluntáriu ESHANA sira katak ESHANA kuda dadauk ona espiritu nasionalizmu no patriotizmu, liuhusi atividade voluntária sira.

Ne’e hanesan indikasaun ida katak iha futuru, joven universitáriu sira ne’e sei serbi ba rai ne’e ho fuan no domin. “Hatoman aan iha vida voluntarizmu, kuda dadauk espiritu voluntáriu ho fuan no responsabilidade hodi hatutan espiritu voluntarizmu FALINTIL sira nian,” nia fó hanoin.

Hodi apela: “Mai ita dedika aan ho voluntáriu ba rai ida ne’e, hodi deskobre espiritu voluntarizmu FALINTIL sira nian. Hametin espiritu voluntarizmu iha ita-nia fuan hodi halo dedikasaun ba rai no povu ida ne’e!”.

Jornalista: Rafy Belo

Editór : Manuel Pinto

HUSIK IDA HATÁN