Empreza Kuaze 200 Taka Atividade Ekonómika

0
116
Diretór Ezekutivu SERVE, Florêncio Sanches.

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete kompañia kuaze 200 mak hapara nia atividade ekonómika, maibé SERVE buka meiu atu netraliza situasaun.

“Haree ba lala’ok atividade ekonómika iha rai-laran tebes duni ema (empreza) sira maioria depende ba Orsamentu Jerál Estadu, entaun iha fulan sia ba kotuk iha problema boot ba sirkulasaun osan, ida ne’e halo emprezáriu sira sente laiha rendimentu, ne’ebé iha fulan juñu ha’u simu pedidu atu taka sira-nia kompañia hamutuk 69, maibé akumula hamutuk dalaruma loron ida hetan pedidu rua, tolu”, Florêncio relata iha Matadouru, ohin.

Tanba pedidu barak liu iha fulan refere, SERVE bolu empreza na’in hodi ko’alia ho sira, tanba instituisaun ne’e labele simu tan de’it kompañia taka ho razaun laiha rendimentu, menus sirkulasaun osan ne’ebé espalla iha komunidade.

“Ha’u bolu sira, hatete bele taka de’it atividade ekonómika, maibé labele taka kompañia”, katak.

Enkuantu empreza sira relata ba SERVE katak Governu ezije atu selu taxa, maibé daudaun ne’e sira lahalo negósiu, nune’e SERVE hato’o ba sira bainhira lahalo atividade iha lei tributária númeru 8/2008 hatete kuandu laiha atividade labele selu lai taxa to’o situasaun normál fali bainhira negósiu la’o ona.

“Ne’ebé sujestaun ne’ebé SERVE hasai sira rona no ikus mai númeru atu taka kompañia menus ba beibeik, maibé sira hakarak tahan aan de’it labele halo atividade. Situasaun ne’e tanba sira depende demais ba Orsamentu Jerál Estadu”, akresenta.

Florêncio subliña ida ne’ebé provoka atu taka kompañia ne’e loloos la’ós mai husi timoroan, maibé husi empreza estranjeiru.

“Ema estranjeiru ne’ebé na’in ba kompañia, la’ós inisia husi ita timoroan. Ida ne’e mak ha’u lamenta nusá mak ita-boot sira provoka situasaun, ha’u haree iha dadus ita-boot sira tinan tolu sa’e ba kotuk ne’e simu projetu boot husi Governu, foin mak fulan sia ne’e ita-boot sira taka ne’ebé sira konkorda taka de’it nia atividade”.

Hatutan empreza internasionál sira dependente porsentu 100 ba Orsamentu Estadu, tanba ne’e bainhira osan laaprova sira monu.

Diretór Ezekutivu ne’e dehan atividade ne’ebé taka ne’e hanesan loja ki’ik sira no kompañia iha área konstrusaun nian.

“Importante mak sira deside lakohi taka kompañia, maibé taka de’it atividade, tanba SERVE nia objetivu loloos mak labele taka kompañia, maibé taka de’it atividade no ne’e normál”.

Jornalista: Maria Auxiliadora

Editora: Rita Almeida

HUSIK IDA HATÁN