DILI, (TATOLI) – Deputada Bankada FRETILIN, Josefa Álvares Pereira Soares, sujere ba Governu daualu halo verifikasaun molok selu projetu sira.
“Ha’u sujere antes halo pagamentu, halo uluk verifikasaun, tanba ita konsidera buat importante balun mak hanesan, governu mak sala ou kontratante mak sala ou kontratante ho governu mak sala, ne’e grave”, deputadu hatete iha ninia intervensaun durante debate jeneralidade Orsamentu Jerál Estadu (OJE) 2018 ba loron datoluk iha plenária, kuarta (29/8).
Nia hatutan OJE 2018 ba fulan haat boot liu despeza fulan janeru to’o agostu, mas komprende ba aumentu ne’e tanba Kapitál Dezenvolvimentu totál millaun $392 inklui ona atu selu projetu ne’ebé hanesan konsidera polítiku ho polítika individuál ne’ebé laiha estudu viabilidade ba degradasaun ambientál no seluk tan.
“Ha’u konfia tebes ita boot katak sei haree situasaun ne’e, tanba buat ne’ebé la tuir lei no regra ita boot sei esklui, tanba ita boot nia kompromisu iha juramentu: ha’u jura atu kumpre lei no halo ema atu kumpre lei no konstituisaun. Ida ne’e ha’u garante katak ita boot sei halo ida ne’e, ha’u fiar ita boot no louva”, tenik.
Nia informa OJE 2018 foti millaun $985 husi Fundu Minarai, Rensimentu Sustentável Estimadu (RSE) hamutuk millaun $550, foti millaun $435, signifika alende ne’e razaun balun ne’ebé koloka, maibé nafatin kontinua ho prátika levantamentu sustentável ba despeza ne’ebé la sustentavél sei estraga futuru jerasaun tuir mai.
Deputada hatutan komesa 2009 to’o 2018 hahú levantamentu aas liu RSE, enkuantu fundu soberana ida de’it mak Fundu Minarai, tanba ne’e importante halo diversifikasaun ekonomia liu kona-ba dezenvolve fonte rendementu alternativa no sustentavél hodi hasoru situasaun Bayu Undan ne’ebé tun no Greater Sunrise iha prosesu negosiasaun ne’ebé seidauk iha serteza.
Nia konsidera proporsionalidade distribuisaun iha OJE 2018 la hatudu ekuitativu no kontradis ho prioridade estimasaun programa Governu nian.
Jornalista: Julia Chatarina
Editora: Rita Almeida
