DILI, (TATOLI) – Bispu Dioseze Dili, don Virgilio do Carmo, Baukau, don Basilio do Nascimento no Maliana, don Norberto do Amaral, ohin hasoru Primeiru-Ministru, Taur Matan Ruak, iha Palásiu Governu hodi ko’alia situasaun iha rai-laran nomós kongratula Xefe Governu.
“Ohin ami mai aprezenta kumprimenta kortezia ba Primeiru-Ministru, Taur Matan Ruak, kontestu foun, situasaun foun, governu foun, dezafiu foun, responsabilidade foun”, hateten Prezidente Episcopal Timor-Leste, don Basílio do Nascimento.
Durante hasoru malu Xefe Ezekutivu partilla informasaun kona-ba funsionamentu governu no esperansa ba futuru.
Bispu sira hakarak lideransa Nasaun nian rezolve situasaun polítika iha rai-laran ho hakmatek hodi aselera prosesu dezenvolvimentu.
Amu Bispu fiar Xefe Governu, tanba iha ona esperénsia no kapasidade atu ukun. “Primeiru-Ministru biar foun, maibé iha esperénsia, hatene, koñese Timor, uluk iha ai-laran koñese luta, depois jenerál F-FDTL, Prezidente Repúblika no agora hanesan Primeiru-Ministru”, tenik.
Jornalista: Agapito dos Santos
Editora: Rita Almeida
