Bianco “Duvida” ho Promesa PM Atu Trava Ezvanjamentu

1
335
Membru PN hosi Bankada FRETILIN, Antoninho Bianco.

DILI (TATOLI)—Deputadu bankada opozisaun FRETILIN, Antoninho Bianco, la fiar liafuan primeiru-ministru, Taur Matan Ruak, iha nia diskursu ba debate Orsamentu Jerál Estadu (OJE) katak trava ezvanjamentu.

“Se ho karater emerjénsia maski OJE 2018, ezekusaun mós sei emerjénsia de’it, kualidade sei mosu hanesan emerjénsia nó mós sei la gasta hotu. Ha’u hanoin se liga ba primeiru-ministru nia diskursu atu trava ezvanjamentu, ne’e difisil oituan,” Bianco dehan liuhusi intervensaun iha debate OJE 2018 iha plenária Parlamentu Nasionál, tersa ne’e.

Deputadu Fretilin ne’e kontinua kestiona orsamentu jerál Estadu (OJE) 2018 ho karater emerjénsia tanba orsamentu ida ho karater refere sei rezulta de’it rezultadu emerjénsia.

Indikadór maka ezekusaun orsamentu fulan ualu liu-ba, osan ne’ebé fó ba kada ministériu maski ho karater duo-désimu, maibé la konsege gasta hotu.

“Dadus ne’ebé ha’u hetan, altura ne’ebá Governu gasta miloens $400 resin de’it. Signifika, ho estrutura orsamentu agora daudaun ne’ebé kuaze miloens $800 ne’e, halo oinsá maka ita justifika katak ita iha kapasidade bele ezekuta iha tempu ne’ebé efetivu fulan tolu de’it,” deputadu ne’e kestiona.

Hodi rekomenda ba primeiru-ministru atu tetu orsamentu ne’e halo didi’ak no, karik bele, muda orsamentu refere ba item seluk nune’e bele halo kobertura ba buat balun ne’ebé nesesáriu liu.

Entretantu, Primeiru-Ministru, Taur Matan Ruak, hateten, hanesan Governu, sira nia kompromisu maka oinsá poupa orsamentu ne’ebé merese atu poupa, redús gastu no investe iha área sira ne’ebé importante.

Taur afirma katak orsamentu ne’ebé Governu aprezenta ne’e natoon loos atu sustenta mákina Estadu no atende kompromisu-sira.

“Ami iha konfiansa tomak katak sei implementa hotu orsamentu ne’e. Se ita haree ba setoriál ezekusaun orsamentu ho persentajen porsentu 90 itál  (90%), ne’e di’ak ona no mínimu liu tenke ezekuta porsentu 80 (80%),” xefe governu otimista.

Jornalista: Xisto Freitas

Editór : Manuel Pinto

1 COMMENT

  1. Tanba moris iha duvida nia laran hela deit. “Iha Prosesu ba URA ema barak duvida no fim URA. Iha prosesu luta ba Fronteira Maritima ema barak mos duvida no fim ita hetan duni fronteira maritima. Iha Prosesu dada kadoras mai TL ema barak mos duvida. Duvida nee hela ba o, mai la duvida tanba hau hatudu ona”. Komandante Em Chefe das FALINTIL, Kay Rala Xanana Gusmao.

HUSIK IDA HATÁN