Bankada CNRT Hato’o Agradesimentu Ba PR

0
648
Bandeira partidu CNRT. Foto espesiál

DILI, (TATOLI) – Bankada Kongresu Nasionál Rekonstrusaun Timor (CNRT-sigla portugés) hato’o agradesimentu ba Prezidente Repúblika, Francisco Guterres Lú Olo, liuhosi deklarasaun polítika iha plenária, ohin, tanba promulga ona dekretu Parlamentu Nasionál ho numeru 1/V ne’ebé fó autorizasaun estraordinária ba governu atu ezekuta orsamentu milliaun U$140 hosi fundu petrolíferu.

“Bankada CNRT hanesan parte bankada governu nian, agradese ba Nai Prezidente Repúblika, tanba promulga ona dekretu Parlamentu Nasionál ne’e, nune’e governu bele iha ona iis foun atu sustenta mákina Estadu, hodi responde situasaun estraordináriu povu nian, antes Orsamentu Jerál Estadu (OJE) 2018 diskute no aprova”, tenik deputada Bankada CNRT, Lúcia Taeki, liuhosi deklarasaun polítika.

Deputada ne’e hatutan levantamentu orsamentu ho montante milliaun U$140 husi fundu petrolíferu ne’e bele ajuda governu hodi viabiliza rejime duodesimál fulan jullu no agostu 2018.

“Hafoin hamosu polémika no dúvida kona-ba konstitusionalidade diploma ida ne’e, maibé ikus mai dekretu Parlamentu Nasionál hetan apresiasaun hosi Tribunál Rekursu no deklara katak la kontra konstituisaun”, dehan tan.

Nia hatutan tan mesmu bankada sei proukupa ho Nai Prezidente Repúblika nia estatutu hanesan prezidente partidu. “Ho haraik án ami husu atu hala’o nia kna’ar nafatin ho onestu, prudente no imparsiál atu halo tuir Konstituisaun Repúblika haruka”.

Liuhosi plenária ohin, Prezidente Parlamentu Nasionál, Arão Noe, hatutan lei nú 1/2018 10 agostu kona-ba autorizasaun estraordinária realizasaun tranferénsia fundu petrolíferu promulga ona iha sesta loraik husi PR no públika ona iha Jornál Repúblika.

Entretantu liuhosi reuniaun estraordinária iha sesta kalan (20/7), aprova proposta lei husi governu kona-ba autorizasaun estraordinária ba realizasaun transferénsia husi fundu petrolíferu.

Hafoin aprovasaun karater urjénsia ba proposta lei nú 1/V, loron ne’e kedan PN halo diskusaun no votasaun jeneralidade no espesialidade ho votasaun finál globál nia rezultadu a favor 35, kontra 25, no abtensaun 3.

Jornalista: Julia Chatarina

Editora: Rita Almeida

HUSIK IDA HATÁN