Asanami Husu Atu Deside Kuríkulu Dala Ida

0
207
Parlamentu Nasionál. Foto Relasaun Públika PN

DILI, (TATOLI) – Deputadu Bankada Partidu Demokrátiku (PD), Mariano Assanami Sabino, hateten ukun rasik án ne’e konsentra ba ema, tanba kuríkulu tenke deside dala ida.

“Ha’u hanoin kuríkulu ne’e tenke deside dala ida, la’os governu ida mai troka, ida ba troka maibé tenke deside dala ida. Ita nia ukun rasik án ne’e konsentra iha ba ema, la’os ba dalan, ekonomia maibé buat hotu fila ba ema”, hatete bainhira halo intervensaun iha plenária, ohin.

Nia hatutan, ho razaun ne’e mak iha Planu Estratéjiku Dezenvolvimentu Nasionál (PEDN) kuandu remata, iha fundu rua: infraestrutura no rekursu umanu, para kuandu ita nia rekursu naturál remata, ema mak sei troka hodi la’o ba oin.

“Tanba ne’e kuandu ita ko’alia kona-ba interesse nasionál la’os ida-idak define ba ita nia hakarak, portugés ne’ebé mak opta ne’e uluk hau kontra língua ida ne’e mas interesse nasionál nomós indentidade mak ita pro”, dehan tan.

Deputadu ne’e konsidera laiha konsisténsia no kompromisu para dezenvolve língua.

“Ita laiha kompromisu no seriedade tanba ita ko’alia buat hotu polítika de’it la’os ba rai ne’e nia di’ak, ita subar interesse iha ida-idak nia partidu. Ita mobiliza povu atu tuir ita ba interesse ida-idak ninian. Ita la ko’alia interese joven sira atu la’o ba oin ne’e hanusa”.

Nia dehan, ohin define ona tanba inan aman lahatene portugés mak ita labele hanorin lai portugues maibé nia konsidera razaun ne’e laloos, bainhira hanesan língua ofisiál ona, ema menus edukasaun mós tenke hatene no komunika iha uma laran, maibé durante ne’e ita lakon tempu liu ba polítiku.

“Ita mobiliza povu para tuir ita enkuantu ego ita nia subar iha polítika laran. kontinuidade no konsistente katak governu ida bele mai hatutan no hadi’a para di’ak liu ba sosiedade”, katak.

Tuir nia, Governu ida ne’e presiza mai hadi’a ho di’ak liu, tanba ne’e nusa mak la mai hadi’a nia kontiúdu no reajusta ho situasaun atuál hodi kuríkulu ne’e aprova dala ida.

Hosi konsidera portugés no tetum hanesan língua ofisiál maibé língua nasionál mós ita nia identidade.

“La’os dehan ita halakon fali língua nasionál sira seluk, ida ne’e nafatin konsegra mas labele sai instrumentu no razaun katak labarik ida iha uma laran la ko’alia portugés ona, nia sai labele ko’alia língua ne’e”.

Nia dehan tan, bainhira kondisaun ne’e kontinua bebeik no ita halo tuir, ema sei laiha esforsu hodi aprende, tanba edukasaun hanesan esforsu ida atu aprende.

Jornalista: Julia Chatarina

Editora: Rita Almeida

HUSIK IDA HATÁN