Adventure Timor-Leste Sei Halo Jornada Hodi Presta Omenajen ba Eroi Sira

0
54
Brigadeiru Jenerál, Falur Rate Laek. Foto/Google.

DILI, (TATOLI)- Koordenadór Adventure Timor-Leste, Elvino Alves Correia, hatete grupu aventureiru ida ne’e sei halo jornada husi munisípiu Manufahi, postu administrativu Alas, hodi presta omenajen ba eroi sira ne’ebé mate ona ba rai ida ne’e.

Jornada ne’e sei hahú iha 9 agostu no sei arranka la’o ain husi Alas iha 10 fulan ne’e no to’o iha Dili iha iha ámbitu komemorasaun loron Forças Armadas de Libertação Nacional Timor-Leste (FALINTIL) nian iha 20 agostu 2018.

“Jornada ida la’o ain hanesan sakrifika ita-nia aan hodi fó hanoin hikas fali situasaun ida ne’ebé mak iha momentu difisil, mas povu Timor-Leste iha korajen hodi luta hetan nia independénsia”, Elvino afirma iha Muzeu Rezisténsia, ohin.

Rute ne’ebé mak jornada ne’e liu mak fatin istóriku nian no grupu sei la’o hamutuk ho abitante, autoridade lokál no testemuña sira ne’ebé hola parte husi suku ne’ebé sira hela ba hodi partilla informasaun kona-ba saida mak akontese iha sítiu sira ne’e.

Brigadeiru Jenerál, Falur Rate Laek, agradese ba grupu joven sira ne’e tanba fó valór ba fatin istóriku sira ne’ebé sei halo marsa hodi hakat liu sítiu sira ne’e.

“Fo importante ba natureza tanba natureza ne’e amiga umanidade nian, mas kuandu fila inimigu destroe umanidade mós iha. Ita fó valór ba natureza tanba liga mós ba ita-nia istória”, Falur katak bainhira sai oradór iha semináriu nasionál ne’ebé organiza husi grupu ne’e ho tema “Hametin nasionalizmu no patriotizmu, tane aas ita-nia istória no harii ita-nia futuru” iha Muzeu Rezisténsia, ohin.

Hatutan FALINTIL simu papél importansísimu iha funu ne’e tanba ne’e mak valoriza no selebra nia loron.

“Fó valór ba ita-nia natureza, importante mak imi hotu-hotu (bainhira halo jornada) ajuda para labele so’e plástiku, botir, hena, organiza lixu, tanba ita-nia natureza ne’e mak salva ita moris iha funu ne’e, ita-nia natureza ne’e mak halo ita determinante ita manán funu. Imi bá karik boa viajen, parabéns tanba imi komemora loron ne’e, kuandu halo ida ne’e imi konserva espíritu gerreiru FALINTIL nian, espíritu solidariedade, imi ba liberta imi-nia hahalok hodi solidariza ho FALINTIL nia sakrifísiu, korajen, abnegasaun, lealdade ba ita-nia povu”.

Jornalista : Maria Auxiliadora

Editór : Manuel Pinto

HUSIK IDA HATÁN