DILI, (TATOLI)-Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão lansa livru entituladu ‘Nova Fronteira, a conciliação histórica de Timor-Leste sobre as fronteiras marítimas no mar de Timor’ iha Arkivu no Múzeu Rezisténsia Timor-Leste (AMRT)-Dili, hodi kalan, 30 agostu-loron konsulta populár.

Xanana hateten katak ho fahe informasaun liuhusi livru ne’e, liliu iha nasaun hanesan ita-nian, nu’udar matéria estudu, iha ámbitu prosesu tékniku no sientífiku, ne’ebé estadu lidera, nu’udar produtu importante ba jerasaun agora no tuir mai.

“Tanba ne’e, ho partikulár satisfsaun hodi ha’u bele iha ne’e lansa ‘obra ki’ik’ ne’ebé retrata barak kona-ba prosesu konsiliasaun ho Austrália. Publikasaun ne’e, reflete kapítulu importante iha istória Timor-Leste, nasaun ki’ik ne’ebé hakarak haree nia direitu rekoñese internasionalmente, hodi supera dezafiu konstante sira,” dehan xefe negosiadór Prinsipál Kay Rala Xanana Gusmão.

Xanana akresenta katak Timor-Leste sei hanoin bebeik nia luta difísil ba libertasaun, kontra okupasaun husi viziñu poderozu ida, ho asesu rekursu no meius sira ne’ebé labele kompara ho Timor-Leste.

“Apesarde lakon ema ne’ebé ita la bele repara no destruísaun, la’o durante tinan 24, ita bele hetan vitória iha ita-nia luta ba indepedénsia,” konsidera eis-lider rezisténsia Kay Rala Xanana Gusmão.

Eis-lider rezisténsia ne’e akresenta tan katak sei ho frazilidade no tarefa kolosál hodi harii nasaun hahú husi rai rahun, obriga tan ita hodi galo luta foun. Dalai da tan hasoru nasaun viziñu boot ida-Austrália, ne’ebé la sura ho maturidade no ho reziliénsia husi timoroan sira atu disputa ita-nia direitu soberanu kona-ba área marítima ne’ebé pertense ba ita.

“Konfirmasaun kona-ba ita-nia direitu soberanu, signifika ba ita liu fali konkretizasaun óbvia ba ita-nia indepedénsia polítika no ekonómika. Trata mós, hodi asegura sakrifísiu povu nian ne’ebé liu ona no konstatasaun husi buat ne’ebé ba ita karun liu: soberania totál!,” dehan xefe negosiadór Xanana Gusmão.

Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão agredese ba entidade hotu no timoroan sira ne’ebé apoiu ekipa negosiasun hodi negosia ho Austrália iha prosesu delimitasaun fronteira marítima.

“La ho empeñu, profisionalizmu no dedikasaun Gabinete Fronteira Marítima, ita-nia ekipa asuntu petróleu, DLA piper (firma lei multinasionál) no ita-nia ekipa Konsellu Superiór posívelmente, ita sei la hetan susesu iha rezultadu ne’e,” akresenta xefe negosiadór Kay Rala Xanana Gusmão.

Nia hatutan, la ho patriotizmu, unidade no prezervansa husi ita-nia lider sira, dezde primeiru momentu ita-nia independénsia, em torno fronteira marítima, ita la halibur kondisaun ne’ebé nesesária atu enseta prosesu konsiliasaun nian.

“Permite mós ba ha’u atu destake papel ne’ebé importante mós dezempeñadu husi ministru Agio Pereira no doutór Rui Maria de Araújo, pesa fundamentál sira iha xadrez kompleksu ne’e ba iha prosesu konsiliasaun,” husu xefe negosiadór ne’e.

Xanana reforsa katak se la ho mós solidariedade no apoiu tomak husi komunidade sira ne’ebé espalla iha mundu, hahú husi Austrália, nasaun g7+ sira, hahú husi Portugál no nasaun CPLP (Comunidade dos Países da Língua Portuguesa).

Nune’e mós importante komunidade luzu-amerikana (jerasaun Portugal ho Amérika) ne’ebé hela iha Estadu Unidu Amérika (EUA), ita la iha sentidu ne’ebé enkorajadu hodi avansa no defende ita-nia direitu sira.

Xanana mós hato’o agredesimentu ba povu timoroan tomak ne’ebé fó inspirasaun mai ita hotu ho maturidade.

“Tratadu Fronteira Marítima ho Austrália nu’udar úniku objetivu ida hodi garante dezenvolvimentu povu timoroan sira hodi nune’e bele moris ho dignidade. Agora ho ksolok boot ha’u lansa ofisialmente livru: Novas fronteiras, a conciliação histórica de Timor-Leste sobre as fronteiras marítimas no mar de Timor,” Xefe Negosiadór Kay Rala Xanana Gusmão akresenta.

Iha momentu hanesan, eis-lider rezisténsia Kay Rala Xanana Gusmão mós halo reflesaun hamutuk ho veteranu sira balun, korpu diplomátiku, sosiedade sívil, labarik, foinsa’e no sidadaun timoroan sira balun tan hodi lembra povu nia determinasaun, korajen no pasiénsia ba autodeterminasaun.

Iha reflesaun ne’e Xanana hateten katak ita tinan 19 ona kona-ba data konsulta popular, hanoin hikas loron ne’ebá, midar no moruk, ne’ebé alende siik tan kapítulu ida ba brutalidade ne’ebé inflijidu iha data ne’e, povu ho aten-brani ba iha urna sira, liuhusi prosesu demokrátiku ida, la sala, hodi hili ba nia auto-determinasaun.

“Tanba ne’e, molok ita hala’o eventu ne’ebé mak ita halibur ohin, husu ba ita hotu minutu ida hakmatek hodi fó omenajen ba sira ne’ebé eroikamente selu ho presu ne’ebé difísil ba liberdade ne’ebé mak ita hetan,” hateten Kay Rala Xanana Gusmão.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here