Deputadu sira halo votasaun iha diskusaun espesialidade Orsamentu Jerál Estadu (OJE) 20018 iha uma fukun Parlamentu Nasionál. Imajen António Goncalves

DILI, (TATOLI) – Parlamentu Nasionál (PN), liuhosi debate espesialidade loron dahuluk iha sesta kalan (31/8), aprova orsamentu ba Prezidénsia Repúblika ho montante millaun $3,524, ho rezultadu a favor 55, kontra 0 no abstensaun sia.

Husi montante ne’e, ba saláriu no vensimentu $817.000, bens servisu millaun $2,707, tranferénsia públika, kapitál menór, no kapitál dezenvolvimentu laiha.

Orsamentu ba Prezidénsia Repúblika ne’e hetan proposta aditamentu no alterasaun husi deputadu proponente sira no husi proposta tolu ne’e hetan hotu aprovasaun.

Proposta dahuluk ne’ebé passa ho votu a favor 54, kontra 1 no abstensaun sia, hanesan proposta alterasaun kategoria despeza ba saláriu no vensimentu $817.000 propoin atu halo aditamentu $1.000 ho dotasaun finál $818.000.

Proposta ne’e atu propoin hasai husi fundu infraestrutura iha karegoria despeza kapitál dezenvolvimentu ne’ebé hetan dotasaun inisiál $323.600, atu redús $1.000 ho dotasaun finál $322.599.

Aditamentu orsamentu hirak ne’e atu halo pagamentu ba oras estraordináriu ba motorista sira iha Prezidénsia Repúblika.

Proposta daruak ne’ebé passa ho votu a favor 52, kontra neen no abstensaun lima, iha kategoria bens servisu gabinete Prezidénsia Repúblika, dotasaun inisíal ba kategoria ne’e $112.000 no adisionál 150.000, nune’e dotasaun finál $272.000.

Orgaun Prezidénsia Repúblika, kategoria despeza bens servisu iha Kaza Sivíl, ho dotasaun inisiál milliaun $1,85, propoin aditamentu ba milliaun $1,949, ho dotasaun finál milliaun $3,934.

Kategoria bens servisu ba Kaza Militár ho dotasaun inisiál $610.000 ho adisionál $2.000, nune’e dotasaun finál $612.000. Orsamentu ne’ebé propoin hasai husi fundu infraestrutura.

Iha kategoria despeza kapitál dezenvolvimentu ne’ebé dotasaun inisiál $323.600 ho alterasaun $2.101 ho dotasaun finál ba karegoria ne’e $321.499.

Propoin adiantamentu ne’e atu kobre despeza kategoria bens servisu ba kada orgaun Prezidénsia Repúblika hanesan Gabinete Prezidénsia Repúblika, hanesan servisu operasionál sira $150.000, verba adisionál ne’e atu atende desizaun polítika Xefe Estadu.

Kaza Sivíl viajen lokál $50.000, atu kobre despeza vizita Xefe Estadu ba munisípiu Vikeke, Lautein, Baukau no Bobonaru no viajen ba programa konjuge Xefe Estadu.

Viajen estranjeiru $927.252,8, ne’ebé prevista vizita Estadu no traballu Xefe Estadu iha país lima no pagamentu ba billete viajen.

Iha fulan setembru, PR sei iha vizita ba atividade oin-oin iha biban sesaun jerál assembleia Organizasaun Nasoen Unida (ONU) ho valor $220.000, iha outubru PR sei desloka ba Austrália no Bali (Indonézia), konvite husi PR Jokowi atu partisipa iha Bali Forum ho valor $200.000, iha novembru hatan konvite Papa Francisco, ho valor $203.000.

Dezembru PR hetan konvite husi Sekretáriu Jerál ONU atu partisipa enkontru altu nível Global Compact iha Maroco, ho valor $150.000.

Proposta datoluk ne’ebé passa ho votu a favor 58, kontra rua no abstensaun haat ba kategoria Kapitál Menór, ho dotasaun inisiál 0 no dotasaun propostu $123.000, osan ne’e proponente husi fundu infraestrutura kategoria kapitál dezenvolvimentu ne’ebé ho valor $323.000, alterasaun $123.000 no dotasaun finál $323.477.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here