Ministra Finansa em ezersisiu, Sara Lobo Brites. Foto António Goncalves

DILI, (TATOLI) – Ministra Finansas em ezersísiu, Sara Lobo Brites, hatete Ministériu Finansas (MF) kontinua atualiza sistema ne’ebé alfándega uza hanesan Automated System for Customs Data (Asycuda World) no Sitgas atu kobre reseita.

“Asycuda upgrade (atualiza) ona ba versaun ikus, tanba tempu naruk uza versaun antigu no agora iha prosesu nia laran atu halo upgrade ba Sitgas, oinsá atu sistema ne’e bele kaptura dadus no bele iha liu feature (elementu) atu bele ajuda lei tributária hasa’e reseita”, hatutan iha sesaun plenária debate Orsamentu Jerál Estadu (OJE) 2018 iha faze espesialidade loron dahuluk, sesta (31/8).

Esplikasaun ne’e hodi hatan ba deputadu bankada CNRT, Adérito Hugo, ne’ebé husu kona-ba progressu reforma fiskál ne’ebé durante ne’e liga ho kompromisu governu atu hasa’e reseita non-petrolíferu.

“Ha’u presiza esplikasaun hodi haree ita nia reseita Non-Petrolíferu, projeisaun estimasaun millaun $143, hanesan númeru ne’ebé laiha mudansa husi tinan kotuk, kuandu ita ko’alia atu ultrapassa reseita Non-Petrolíferu, maizumenus liga ho saida husi Primeiru-Ministru nia aprezentasaun iha inísiu katak sei ita bele ultrapassa millaun $200, nune’e ita bele kobre ona rúbrika saláriu no vensimentu ba tinan ida”, tenik.

Alende ne’e, Ministra Sara hatutan reforma fiskál prepara ona revizaun ba lei tributária nomós esbosu lei Impostu ba Valor Akresentadu (IVA), maibé agora MF seidauk aprezenta tanba sirkunstánsia balun. 

“Prosesu sira ne’e la’o hela, no ami seidauk bele hatete ninia konluluzaun, ida ne’e mak ami nia espetativa ba oin, ho mudansa sira ne’e ami fiar katak sei iha aumentu iha reseita doméstika”, katak.

Governante ne’e mós rekoñese falta rekursu umanu alfándega, liu-liu iha Autoridade Aduaneira no Autoridade Tributária, tanba ne’e iha planu atu halo rekrutamentu maibé iha hela rejime duodésimu, rekrutamentu seidauk hala’o no prosesu sei pendente.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here