DILI, (TATOLI)- Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão konsidera katak Timor-Leste (TL), nasaun ne’ebé ema konsidera ki’ak, rekursu limitadu no la hatene interese saida mak jogu iha Tasi Timor, direitu internasionál nu’udar “Arma” importante ba rezultadu ikus hodi luta ba soberania teritoriál.

Ita nia luta naruk ba libertasaun nasionál la’ós de’it halo iha ai-laran maibé inklui mós palku husi komunidade nasaun sira, uza arma direitu internasionál.

“Liu ona kuaze dékada rua, ikus mai ita konsege hamonu serku, sistema no direitu internasionál ikus mai iha duni ita-nia sorin. Iha kontextu ida ne’e mak ita bele posível organiza no realiza konsulta populár 30 agostu 1999,” dehan Xanana Gusmão, iha Arkivu no Múzeu Rezisténsia Timor-Leste (AMRT)-Díli, hodi kalan (kinta, 30/08).

Iha fatin hanesan, eis-primeiru-ministru, Kay Rala Xanana Gusmão hato’o mós omenajen ba saudozu eis-sekretáriu jerál Nasaun Unida, Kofi Annan, ne’ebé hakotu nia iis tanba moras, iha ospitál Suécia, ho idade 80.

“Kofi Annan, ema ekstraorsináriu ida, diplomata umanista no pasífika, forsa konduz  ne’ebé iha sistema internasionál nia kotuk, iha ámbitu direitu internasionál. Vitória boot ita sei la alkansa bainhira la iha amigo ka alkansa ho lakon boot ida. Tanba ne’e, iha ne’e mós ita-nia omenajen ba ema boot ida iha ita-nia istória,” hateten líder karismátiku ne’e.

Nune’e, tuir lider timoroan ne’e, ita retoma hikas rezultadu ikus ne’e iha prosesu konsiliasaun ne’e mós nu’udar marka importante no ezemplu ba mundu katak sistema internasionál bele kontribui ba rezolusaun disputa marítima kompleksa iha rejiaun nomós mundu.

“Prosesu isa ne’ebé Timor-Leste inagura ona, la’ós de’it, abordajen lejítima no pasífika ba nasaun sira ne’ebé rezolve sira-nia disputa, maibé nu’udar mós posibilidade ida ba alkanes nasaun ki’ik no frájil sira, ne’ebé nonok iha nasaun forte sira-nia oin, hodi iha mós lian,” konsidera eis-xefe estadu, Kay Rala Xanana Gusmão.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here