Primeiru-Ministru, Taur Matan Ruak, akompaña hosi membru governu sira partisipa diskusaun jeneralidade Orsamentu Jerál Estadu 2018 ba loron datoluk iha uma fukun Parlamentu Nasionál, ohin. Foto António Goncalves

DILI (TATOLI) – Parlamentu Nasionál (PN) liuhosi votasaun iha plenária, aprova ona Proposta Lei Nú 2/V (1a) Lei Orsamentu Jerál Estadu (OJE) 2018 iha jeneralidade ho votus afavor 53, kontra 0 no abstensaun 12.

“Ho rezultadu ida ne’e Proposta Lei Nú 2/V (1a) Lei Orsamentu Jerál Estadu pasa iha jeneralidade”, tenik Prezidente Parlamentu Nasionál (PPN), Arão Noé hafoin remata votasaun iha plenária ohin.

PPN mós informa, debate espesialidade sei hahú iha 31 Agostu.

Enkuantu iha diskursu enserramentu, Primeiru-Ministru (PM), Taur Matan Ruak hateten durante loron tolu debate iha jeneralidade, deputadu/a sira iha ona oportunidade atu bolu atensaun ba governu iha aspetu oin-oin, no iha governu nia entendimentu presiza konsidera ou korrije iha redasaun proposta.

“Urjénsia iha dokumentu ne’e justifika ona, la’ós de’it ba nesesidade atu asegura meiu finanseiru no orsamentál sira ne’ebé nesesáriu ba prestasaun di’ak servisu públiku, maibé ba restabelese hotu ho lais, konfiansa iha ita nia ekonomia, espesiálmente hamutuk ho setór privadu ne’ebé dependente liu investimentu ou despeza Estadu”, Pm Taur Matan Ruak tenik.

Xefe Governu espresa vontade firme husi governu ne’ebé nia lidera, atu kontinua servisu ho PN, iha espesialidade, husi modu atu alkansa konsensu nesesáriu para alterasaun sira bele introdús maioria kualidade iha versaun finál proposta lei.

“Ami halo votu atu hetan solusaun hamutuk ne’ebé adekuadu no nesesáriu, ba dalan Kresimentu ekonómiku ne’ebé lais, hadi’a kondisaun vida ita nia povu no dezenvolvimentu sustentável iha ita nia país doben ne’e”, nia esplika.

Hodi garante, OJE 2018 sei responde lejítima espetativa sira husi sidadaun sira ne’ebé hakarak Timor-Leste ne’ebé riku no seguru.

Jornalista:Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here