Eis Defenfór Públiku, Sergio Hornai

DILI, (TATOLI) – Eis Defensoria Públika Jerál, Sergio Hornai, enkontru ho Prezidente Repúblika, Francisco Guterres Lú Olo, hodi ko’alia kona-ba dezenvolvimentu setór justisa iha Timor-Leste espesialmente iha Ministériu Públiku, Tribunál sira no Defensoria Públika.

“Ita hotu hatene katak depois ita restaura independénsia iha tinan 16 liu-ba, ita presiza hametin ita nia dezenvolvimentu institusionál, ita presiza haree atu halo ajustamentu ba ita nia lei sira ne’ebé maka karik iha inkompatibilidade, lakunas no ita mós presiza atu bele reforsa ita nia kuadru operadór setór justisa ninian, nune’e bele halo prestasaun ida efisiente, efikasia ba ita nia sidadaun sira”, tenik Hornai ba jornalista sira iha Palásiu Prezidente Nicolau Lobato, Bairru Pité, kuarta ne’e.

Tuir nia presiza hametin no haforsa setór justisa atu bele mós hetan konfiansa hosi komunidade nasionál no internasionál.

“Hametin setór justisa ita presiza identifika, buka hatene ita nia lakunas, ita nia omísiu no frakeza-sira ne’ebé iha atu bele halo punderasaun liuhusi formasaun ne’ebé maka kontinuidadu no aumenta kuadrus setór justisa”, hatutan Sergio.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here