Kakau. Foto/Google.

DILI, (TATOLI)-Diretór Kooperativa Kafé Timór (CCT-sigla iha portugés), Sisto Moniz Peidade, hatete CCT kuda ona kakau tokon rua iha munisípiu hotu no iha tinan lima mai tan produsaun Kakau iha ona Timor-Leste tanba merkadu ba produtu ne’e iha.

“Ita-nia merkadu iha, agora ita-nia sasán mak kualidade tanba ema presiza mak kualidade”, Sisto dehan iha Bidau-Lesidere, ohin.

Nia haktuir fatin potensiál atu kuda produtu ne’e mak iha Kosta Súl. “Suai, Same bá to’o Vikeke. Ne’e área ne’ebé di’ak loos para atu kuda, ne’e duni sira ne’e kuda tinan ida dala ruma tinan oin bele fuan ona”.

Sisto afirma CCT hola ona Kakau dezde tinan rua ba kotuk to’o ohin tonelada tolu ona no rai hamutuk no iha tinan tolu, haat mai tan ne’e nia produsaun sei aumenta maka’as.

Kakau ne’ebé kuda ne’e husi grupu sira ne’ebé hamahan-an iha CCT no akompaña to’o nia hetan rezultadu hafoin sosa husi kompañia ne’e rasik.

“CCT buka merkadu, kualkér produtu tenke iha merkadu kuandu laiha ita bele kuda mós lá halo buat ida, mas bainhira iha maibé nia folin ne’e tun-sa’e no ita bele fa’an sasán ba iha ne’ebá”.

Tanba ne’e Sisto husu ba agrikultór sira atu lalika hanoin merkadu laiha, maibé importante mak kualidade husi produtu ne’e atubele fa’an.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here