Primeiru-Ministru, Taur Matan Ruak

DILI (TATOLI)—Primeiru-Ministru, Taur Matan Ruak, realsa Governu prontu loos atu selu projetu-sira ne’ebé finalizadu maibé tenke tuir regra.

“Ha’u lakohi hasai osan hosi ha’u nia bolsu para selu fali indisiplina ne’ebé komete hosi sidadaun sira. Tanba ne’e, Governu prontu loos atu selu maibé Governu mós hakarak fó mensajen klaru ba sosiedade katak hotu-hotu tenke tuir regras, hanesan iha juramentu hateten “cumprir e fazer cumprir a lei”. Ha’u jura para atu kumpri lei no ha’u mós hakarak hotu-hotu tenke kumpri lei. Sé maka la kumpri nia ba para iha kadeia ne’ebá,” tenik xefe governu.

“Ha’u mós hateten ba ha’u nia ministru sira katak kuandu ita halo Proposta Lei Orsamentu Jerál Estadu, iha artigu ida hateten katak projetu hotu-hotu ne’ebé orsamentu laiha maka ita halo, iha responsabilidade polítiku no kriminál no liu-tan ida ne’e,” nia mensiona liuhusi debate orsamentu jerál Estadu (OJE) 2018 iha plenária Parlamentu Nasionál, tersa (28/8), relasiona ho deputadu balun nia preokupasaun kona-ba projetu hamutuk 142 ne’ebé konsideradu la tuir lei maibé tama iha OJE 2018 atu selu.

Taur hatutan buat ne’ebé sala labele ta’uk atu hadi’a no pasu importante atu hadi’a maka rekoñese buat ne’ebé halo sala.

“Governu ida ne’e loloos haree ba oin, maibé Governu mós tenke haree ba kotuk tanba Estadu funsiona kontinuidade. Ami la hateten dehan buat ne’ebé halo ona ne’e mesak sala de’it maibé ami mós hateten katak buat ne’ebé ita halo sala labele ta’uk atu hadi’a. Pasu importante atu hadi’a maka atu rekoñese buat ne’ebé ita halo sala. Tanba se buat ne’ebé sala ita laiha kbiit atu rekoñese oinsá maka ita atu halo di’ak ba oin,” nia subliña.

Ba kestaun ida ne’e, primeiru-ministru husu deputadu sira nia apoiu atu rezolve lisuk tanba problema ida ne’e hotu-hotu nian, labele soe todan ba Governu de’it.

 “Ha’u lembra iha tinan 2013-2014, kuandu iha problema boot ba projetu boot-sira iha Tasi Mane (kosta súl), Parlamentu Nasionál harii Komisaun Inkéritu Parlamentár. Iha momentu ne’ebá ha’u nu’udar prezidente repúblika apoiu loos ida ne’e (Komisaun Inkéritu Parlamentár) atu haree projetu ida ne’ebé maka tenke selu no ida ne’ebé maka labele selu,” nia haktuir.

Jornalista: Xisto Freitas

Editór : Manuel Pinto

HAKEREK NO HATÁN

Please enter your comment!
Please enter your name here