Joven sira ho aten brani ezije referendum ba governu Indonézia. Foto google

DILI, (TATOLI) – Diretór Jerál Servisu Koperativu Ministériu Administrasaun Estatál,  Edgar Sequeira Martins, hateten hodi selebra loron konsulta populár ba dala 19 aban, Governu sei halo reflesaun liuhosi transmisaun direta iha kanál GMNTV, kuarta kalan orsida.

ʺOrsida kalan ita sei iha reflesaun ida kona-ba loron konsulta populár no papél igreja nian ba edukasaun sívika sidadaun nian, reflesaun ne’e sei halo iha GMNTV, sei modera hosi padre Angelo Fernandes, live depois buletim kalanʺ, hateten Diretór Jerál ne’e iha igreja Motael, ohin, hafoin partisipa misa selebrasaun loron konsulta populár.

Diretór Jerál Servisu Koperativu Ministériu Administrasaun Estatál, Edgar Sequeira Martins. Foto FB MAE

Iha Interativu ne’e sei aborda kona-ba esforsu ba prosesu luta ba ukun rasik-án no povu Timor ezerse nia hodi vota iha loron 30 agustu 1999.

ʺAban loron 30 laiha atividade, ita nia atividade maka iha 24 organiza funsionariu públiku no komunidade hodi halo limpeza, ohin 29 agustu ita selebra misa agradesementu no kalan iha reflesaun iha GMNTV ba povu iha teritóriu tomakʺ, esplika.

MAE sei konsidera pedidu igreja nian hodi komemora loron povu ne’e iha tinan oin.

ʺIta rejista mensajen amu selebrante nian, hato’o hodi diskute atu tinan oin ho kapasidade orsamentu ne’ebé iha para organiza di’ak liután, kompara ho tinan ida ne’eʺ, Edgar promete.

Edgar hateten problema orsamentu maka impede ministériu atu organiza di’ak liután komemorasaun ne’e.

Membru Governu, Parlamentu Nasionál la marka prezensa iha selebrasaun misa ne’e, tanba diskusaun jeneralidade orsamentu jerál Estadu iha uma fukun.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here