Semináriu internasionál entre UNTL ho UNSYIAH. Foto TATOLI: Rafy Belo

DÍLI, (TATOLI)-Universidade Nasionál Timor Lorosa’e (UNTL) ho Universitas Syiah Kuala (UNSYIAH), Banda Aceh-Indonézia parseria mós ho Institutu Petróleu no Jeolojia (IPJ) Timor-Leste, organiza semináriu internasionál kona-ba etimolójiku estadu risku jeolójiku iha Timor-Leste: relatóriu peskiza kona-ba mikrotemor, sizmolojia no tsunami iha UNTL, ohin.

Semináriu internasionál ho tema geohazard status in Timor-Leste: a research report on microtemor, seismology and tsunami ne’e nu’udar komemorasaun tinan ida, 28 Agostu 2017-28 Agostu 2018, asina nota entendimentu entre ensinu superiór rua ne’e.

Reitór UNTL, Francisco Miguel Martins informa ba jornalista sira, iha Liceu, UNTL, ohin katak iha nota entendimentu entre UNTL ho UNSYIAH define kona-ba halo peskiza no publikasaun hamutuk, mobilidade akadémiku; interkámbiu entre estudante nó mós dosente sira.

“Ohin ita komemora um ano asina MoU (Memorandum of Understanding-red), ita komemora ho implementasaun, realizasaun semináriu internasionál kona-ba dezastre naturál ninian, tsunami, nomós rai nakdoko ninian,” informa tan reitór Francisco Miguel Martins.

Reitór konsidera katak UNTL kolabora ho UNSYIAH Banda Aceh-Indonézia tanba Aceh nu’udar mós laboratóriu moris ida. Tanba ne’e UNTL haruka mós nia profesór sira husi Fakuldade Enjeñária, Departamentu Jeolojia hodi tuir formasaun no halo peskiza iha ne’ebá hodi liga fali mai ho kontextu Timor-Leste nian.

“Iha 2004 kuandu ita haree, rona (tsunami); ema barak, atus ba atus, rihun ba rihun nomós estraga sasan. Universitas Syiah Kuala, Banda Aceh, nu’udar istituisaun superiór ida, nia iha laboratóriu reál, natureza ida atu aprende, atu estuda, atu peskiza, atu bele eleve tan sira-nia matenek hodi hatene uluk, kuandu atu akontese karik  dezastre naturál atu bele fó alerta ba iha nia sidadaun,” nia haktuir.

Reitór fó razaun katak UNTL hili dosente husi Departamentu Jeolojia tanba departamentu ne’e mak iha estudu no entendimentu ne’ebé relevante ho kestaun ne’e.“Entaun ita haruka ita-nia dosente sira ne’ebé mak iha área ne’e, iha kapasidade sientífika i abilidade téknika. Ita haruka ba hodi bele hetan partisipasaun,” dehan reitór Francisco Miguel Martins.

Reitór ensinu superiór públika ne’e informa mós katak iha semináriu internasionál ne’e, dosente na’in rua ne’ebé tuir formasaun iha Universitas Syiah Kuala (UNSYIAH), Banda Aceh-Indonézia ne’e mós aprezenta sira-nia rezultadu peskiza ne’e bé durante sira hala’o, liliu iha Timor-Leste.

Dosente ne’e mak Marcelo Marques inklui seluk tan no aprezenta rezultadu peskiza kona-ba geohazard status in Timor-Leste: a research report on microtemor, in Dili. “Ita-nia profesór na’in rua ne’e mezmu foin tuir treinamentu kona-ba ida ne’e, sira halo peskiza, sira aprezenta rezultadu peskiza para oinsa sira-nia peskiza kona-ba área dezastre naturál; rai nakdoko, tsunami,” tenik reitór UNTL.

Reitór UNTL, Francisco Miguel Martins relembra katak antes ne’e mós TL akontese rai nakdoko no tasi sa’e iha fulan hirak kotuk iha Atabae, ne’e nu’udar alerta ida, tanba ne’e UNTL prepara nia rekursu hodi halo estudu kona-ba ida ne’e. Nune’e iha posibilidade akontese dezastre naturál ruma, karik bele alerta antes ba komunidade hodi antesipa.

“Tanba ida ne’e mak área ida ne’e importante tebes, kuandu Universitas Syiah Kuala mai halo kolaborasaun ho ita; nia iha esperiénsia ida, laboratóriu ida atu hatene tsunami ne’e. Ita-nia plaka tektónika ne’e risku la halimar,” hateten reitór.

“Tanba ida ne’e, ita presiza estuda kle’an, ita hatene, ita-nia koñesimentu para ita deskobre buat hotu ka ita bele halo asaun alarma ruma, alerta ita antes hodi ita evakua ba fatin ruma ne’ebé salva ita-nia vida. Área ida ne’e importante,” nia reforsa.

Reitór UNTL, Francisco Miguel Martins mós konfirma ba Ajénsia TATOLI katak estabelesimentu ensinu ne’e nu’udar instituisun formadora nunka para maibé bebeik atu prepara no intensifika nia rekursu umanu sira, liuhusi estudu no peskiza sientífika sira.

“Ida ne’e mak dezenvolve siénsia no teknolojia, kriasaun no inovasaun. Ida ne’e bebeik de’it. Se ita para, ne’e instituisaun públika, universidade. Hanesan universidade halo peskiza, peskiza atu hetan buat barak, deskobre buat barak i husi deskobrimentu buat barak ne’e mak sai fali siénsia no teknolojia,” esplika reitór Francisco Miguel Martins.

Iha fatin hanesan, Ofisiál Espesialista Rai Nakdoko IPJ (Institutu Petróleu no Jeolojia), Theo Luís da Costa hateten katak iha semináriu internasionál ne’e mós iha biban atu peskizadór sira bele aprezenta rezultadu peskiza sira ho nia objetivu hodi fó hanoin ba komunidade kona-ba sizmu ne’ebé bele akontese iha ita-nia rain.

“Semináriu ohin foka liu ba sismolojia nian tanba ita-nia komunidade seidauk tau konsiderasaun boot ba atividade rai nakdoko. Entaun, atividade ida ne’e fó hanoin oinsa para prepara bainhira rai nakodoko ne’e akontese,” dehan ofisiál Theo Luís da Costa.

 Nia mós informa katak TL iha instrumentu ne’ebé bele hatene rai nakdoko iha oras 24. Instrumentu ne’e ho monitorizasaun oras 24. Ita iha instrumentu ne’ebé sufisiente ona maibé tanba oituan de’it, rai nakdoko ne’e akontese barak, ita presiza instrumentu barak tan.

“Maibé, agora mós ita iha tiha ona, pelumenus ita iha oituan duke la iha liu. Ba oin, ita tenke investe tan osan iha sismometru; la’ós ba rai nakdoko nian de’it maibé ba dezastre barak hanesan rai monu, inundasaun,” konklui ofisiál Theo Luís da Costa.

Partisipa iha semináriu internasionál ne’e mak estrutura makro no mikro UNTL nian, diretór TDMRC (Tsunami and Desaster Mitigation Research Center) husi Universitas Syiah Kuala (UNSYIAH), Banda Aceh-Indonézia, Khairul Munadi, IPJ-nu’udar mós organizadór ba eventu internasionál ne’e, inklui autoridade no konvidadu sira nomós estudante UNTL rasik.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here