Primeiru-Ministru, Taur Matan Ruak, iha debate jeneralidade loron daruak iha uma fukun Parlamentu Nasionál. Foto António Goncalves

DILI (TATOLI)– Deputada Bankada Fretilin, Maria Angélica konsidera Orsamentu Jerál Estadu (OJE) 2018, ne’ebé governu da-8 aprezenta la iha banlansu alias la investe iha kapital umanu ho infraestrutura.

“Nasaun ne’e presiza investe iha infraestrutura no Kapitál Umanu, maibé orsamentu sira ne’e laiha balansu tanba  iha interesse barak mak ita tau osan atu ita gasta deit”, Maria Angélica hato’o iha nia intervensaun iha loron daruak debate jeneralidade Proposta Lei OJE 2018 iha plenária, Tersa (28/08).

Nia fó hanoin durante tinan 11 nia laran Parlamentu Nasionál (PN) aprova billaun $13,7 no gasta ona billaun $11.127,50, kuaze 72,3%, ida ne’e hatudu prosesu orsamentasaun la realista husi montante orsamentu estadu ba iha kapasidade atu gasta.

Realidade hatudu iha kategoria kapitál sira ne’e hotu nota katak laiha balansu orsamentu ho Fundu Infraestrutura tanba  iha Saláriu no Vensimentu gasta husi tinan 2007 to’o agora hamutuk billaun $1,7, Bens Servisu billaun $4, Kapitál Menór millaun $438, Kapitál Dezenvolvimentu billaun US$ 2, Transfeénsia Públika billaun $3 no Fundu Infraestrutura billaun $4, no kiik liu iha Fundu Dezenvolvimentu Kapitál Umanu ne’ebé hamutuk millaun US$ 271.

“Husi kategoria hirak ne’e, Bens Servisu sa’e kuaze pursentu 6,7 tanba  kategoria ne’e hanesan orsamentu ne’ebé mak ita uza no depois hotu deit”, nia kurize.

Kona-bá despezas tinan 2018 hatudu katak ita gasta ona millaun US$ 400 resin no saldo ne’ebé mak iha gasta tan durante periúdu fulan haat nia laran mak millaun US$ 696,6, ne’e hatudu momós katak iha periúdu badak ita iha kapasidade atu ezekuta ho kualidade ou lae?, ida ne’e kestionável ba bankada opozisaun (Fretilín-red).

Triste e duvida mós tanba ita hakarak investimentu, maibé orsamentu ne’ebé alokadu la iha ekilíbriu no la tau konsiderasaun ba fatin ne’ebé bele hetan retornu emediatu ba povu.

Entertantu Primeiru Ministru, Taur Matan Ruak hatan, proposta OJE 2018 ne’ebé governu da-8 aprezenta iha Parlamentu Nasionál, nu’udar proposta de’it, enkuantu iha ona lejitimidade bainhira Prezidente Repúblika promulga ona.

Tanba ida ne’e, nu’udar xefe do governu, Taur Matan Ruak dehan la taka dalan ba deputadu sira atu kontribui hanoin liu hosi proposta iha periudu debate nia laran, hodi halo ajustamentu ba buat ne’ebé presiza atu aloka ba.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here