Primeiru-Ministru (PM), Taur Matan Ruak

DILI (TATOLI) – Primeiru-Ministru (PM), Taur Matan Ruak informa, VIII Governu Konstitusionál iha kategoria despeza rua mak tuir termu ekonómiku mak hanesan, Despeza Korrente hamutuk millaun US$ 601,8 no Despeza Kapitál hamutuk millaun US$ 677,3.

“Ami fiar katak despeza sira ne’ebé maka kontribui, atu hadi’a moris di’ak sidadaun sira no bele kombate moris kiak no subnutrisaun (la iha nutrisaun) ka investimentu iha edukasaun, saúde, protesaun sosiál, defeza, seguransa no justisa, nune’e mós kontribui mós atu haforsa ekonomia ida ne’ebé prósperu, modernu no diversifikada liután”, diskursu Xefe Estadu iha abertura debate jeneralidade Proposta Lei Orsamentu Jerál Estadu (OJE) 2018 iha plenária, segunda (27/08).

PM esplika, maioria despeza ne’ebé halo, nune’e mós ho montante ne’ebé aas liu husi Rendimentu Sustentável Estimadu (RSE) Sei la uza ba Despeza Korrente hodi sustenta mákina Estadu nian, maibé uza ba Despeza Kapitál importante sira ba dezenvolvimentu país.

Despeza Korrente, uza liuliu atu sustenta mákina Estadu nian no bainhira soma ba tinan ida ne’e hamutuk millaun US$ 601,8 ho evolusaun mak hanesan, Saláriu no Vensimentu sira, rejista ona redusaun hamutuk millaun US$ 9,389, Bens no Servisu sira, rejista ona aumentu ida hamutuk millaun US$ 26,619, no Kapitál Menór rejista redusaun hamutuk dolar amerikanu millaun US$ 8,416.

Enkuantu iha Despeza Kapitál nian (ne’ebé inklui empréstimu sira), uza atu promove investimentu iha kapitál umanu, sosiál no ekonómiku no soma ba tinan ne’e hamutuk millaun US$ 677,3 ho evolusaun mak hanesan, Transferénsia Públika sira rejista redusaun hamutuk millaun US$ 159,039, Fundu Dezenvolvimentu Kapitál Umanu nian (FDCH – sigla iha lian portugés), sei kontinua implementasaun Polítika “Investe iha País” ho valór hamutuk millaun US$ 23,9.

 “Iha formasaun ba sidadaun sira tanba kualifikasaun téknika no akadémika rekursus umanus sai  hanesan xave husi susesu kualkér país ne’ebé hakarak sai modernu no kriativu iha futuru”, tenik PM.

Ikus liu iha Despeza Kapitál, iha Kapitál Dezenvolvimentu nian (ne’ebé inklui empréstimu sira), rejista aumentu ida hamutuk millaun US$ 42,998.

Tuir Xefe Governu, despeza sira atu promove moris di’ak labele haree de’it hanesan “gastu ne’ebé la iha retornu”, maibé iha mós ninia komponente “prekursór no multíplikadoor”, liuhusi prepara sidadaun sira ne’ebé matenek, kapasitadu ka kualifikadu, saudavel liu no la iha kbiit atu hasoru situasaun sira ne’ebé hamosu risku sosiál, kondisaun fundamentál sira  ba merkadu traballu nian, ba kompetitividade  ekonomia no hasa’e produtividade nasionál.

Ba nesesidade atu estabelese FDCH iha tinan 2017, uza ona atu kompleta no hadi’a sistema sira, ne’ebé la fó benefísiu ba jerasaun oioin, iha sira nia prosesu formasaun akadémika, téknika no profisionál tomak, tanba ne’e mak tenke investe barak, lalais no di’ak liután iha setór sira hanesan edukasaun, formasaun profisionál no ensinu superiór hodi kualifika sidadaun sira ho forma ida ne’ebé hadi’a produtividade no kompetitividade husi ekonomia.

Nune’e mós nia akresenta, ita tenke hatene katak ho investimentu ne’ebé habelar iha infraestrutura bázika sira no iha ekipamentu públiku koletivu sira, sei aumenta mós iha tinan tuirmai, despeza korrente ne’ebé liga ba ninia funsionamentu no konservasaun, hodi garante kompromisu futuru sira iha. Despeza Korrente ne’ebé baibain ita konsidera la di’ak ba ekonomia, maski  iha nesesidade duni atu aloka meiu barak liután ba gastu sira ne’e.

Tanba despeza ida ne’e importante ba ita nia sidadaun sira nia moris di’ak ba dinamizmu ida ne’ebé boot liután, husi ita nia merkadu rai-laran, importante atu aumenta Despeza Korrente ho forma konxiente no frontál, ne’ebé bele justifika ba ita-nia Povu no Timor nia jerasaun aban bainrua nian konaba ita nia opsaun iha matéria ida ne’e.

Jornalista: Julia Chatarina

Editór : Manuel Pinto

HAKEREK NO HATÁN

Please enter your comment!
Please enter your name here