Adriano do Nascimento.

DILI, (TATOLI) – Vise-Xefe Bankada Partidu Demokrátiku (PD), Adriano do Nascimento, kestiona Governu Konstitusionál da-ualu la integra despeza levantamentu osan Fundu Minarai ho montante millaun $70 husi Governu Konstitusionál dahitu ba Orsamentu Jerál Estadu (OJE) 2018.

“Tanbá sa VIII Governu lakohi inklui despeza osan millaun $70 iha OJE 2018 nu’udar parte integrál despeza hosi rejime doudésimu, sé mak atu relata iha OJE kona-ba restu despeza millaun $70 ne’ebé gasta ona iha rejime doudesmu iha VII Governu nia mandatu? Serake ita tenke hein FRETILIN no PD kaer governu mak sei hatama fali iha OJE hodi hakotu rejime doudésimu iha FRETILIN no PD nia ukun”, kestiona iha intervensaun loron daruak debate jeneralidade proposta lei OJE 2018 iha plenária, tersa (28/8).

Nia hatutan oinsá polítika governu ne’e kona-ba ispíritu Estadu hanesan kontinuidade ida ne’ebé hahú hosi governu ida no hatutan hosi governu seluk.

“Serake osan restu millaun $20 hosi millaun $70 ne’ebé VII Governu foti, governu ida ne’e la uza no haruka fali ba Fundu Minarai, tanba ne’e VIII Governu lakohi hatama iha OJE 2018, hodi halo deskrisaun ba despeza iha OJE 2018”.

Eis governante iha VII Governu ne’e dehan tan proposta lei OJE 2018, artigu 5 alínea 3 ne’ebé hateten autorizasaun ne’ebé iha númeru 1 la inklui transferénsia husi fundu minarai ne’ebé realiza antes inísiu husi prezente lejislatura, hatudu kontaminasaun ego polítiku ba aktus no obra polítika governativa.

“Serake artigu 5 lei OJE 2018 nu’udar dalan ida hodi satan malu no hamonu malu tan, entre VII no VIII Governu ka entre FRETILIN-PD no AMP hodi ignora unidade nasional, rekonsiliasaun polítika entre Timor oan ne’ebé mai hosi hun ida, abut ida, iha Timor-Leste ida de’it”, katak.

Nune’e tuir antigu deputadu ne’e, impase polítiku no aplikasaun rejime doudésimu mosu, tanba polítiku sira desvaloriza malu, satan malu, no hatun malu.

“Ita hatun malu ho lei no konstituisaun. Sim! ita hatun malu, tanba demokrásia ho prinsipiu maioria versu minoria. Maibe, motivu hodi hatun malu ho sentimentu gosta ou la gosta, urgullu pesoál ou grupu, mak habot ego polítiku, ne’ebé kontamina aktus no obra polítika governativa, nune’e hamosu desintegrasaun sosiál no polítika hodi hamihis valór sivilizasaun sosiedade timoroan”, katak tan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here