Primeiru-Ministru, Taur Matan Ruak, hamutuk ho membru governu sira, ohin, iha uma fukun Parlamentu Nasionál, hatan ba deputadu sira sobre proposta lei Orsamentu Jerál Estadu 2018 iha diskusaun jeneralidade. Foto António Goncalves

DILI, (TATOLI) – Primeiru-Ministru (PM), Taur Matan Ruak, hateten Governu daualu Konstitusionál sei implementa medida foun husi ajenda polítika, hanesan pagamentu ba dívida no obrigasaun kontratuál.

“Ami hakarak rezolve dívidas no obrigasaoens kontratuál ne’ebé akumula iha tinan ikus ne’e no seidauk konsege selu, ho totál kustu ba pagamentu sira hamutuk $87 milloens”, Xefe Governu hatete iha abertura debate jeneralidade proposta lei Orsamentu Jerál Estadu (OJE) 2018 iha plenária, ohin.

Pagamentu hirak ne’e mak milliaun $64,5 aloka iha dotasaun ba governu hotu atu reembolsa taxa husi esplorasaun KITAN, milliaun $6,9 ba pagamentu retroativu aumentu saláriu ba profesór sira iha munisípiu hitu ne’ebé hetan promosaun entre tinan 2013 no 2017, milliaun $5,8 aloka ba desalfandegamentu lais.

Nune’e mós, milliaun $4,5 pagamentu dívida ba Timor-Telecom, milliaun $2,2 pagamentu dívida eletrisidade, milliaun $1,5 ba Universidade Nasionál Timor Lorosa’r (UNTL) ho razaun atu selu dívida oin-oin ne’ebé akumula entre tinan 2016 no 2017.

Enkuantu milliaun $0,8 ba Polísia Nasionál Timor-Leste (PNTL) atu kobre dívida relativa ba manutensaun embarkasaun CCTV no telekomunikasaun sira, milliaun $0,5 ba FALINTIL-Forsa Defeza Timor-Leste (F-FDTL), ho objetivu selu subsídiu pendente sira no kustu adisionál ne’ebé asosiadu ba eleisaun foin lais.

Milliaun $0,3 kobre kustu restu ne’ebé seidauk selu iha eleisaun suku tinan 2016.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here