Konferensia Imprensa konjunta TELKOMCEL ho Governu Timor-Leste ne'ebé halo iha salaun eis-ministériu finansa, ohin. Foto António Goncalves

DILI, (TATOLI) – Telkom University, Bandung-Indonézia liuhosi kooperasaun entre Governu Repúblika Indonézia no Timor-Leste, lansa programa bolsu estudu iha área Information and Communication Technology (ICT) no sei fó oportunidade ba timoroan nain 10.

Liuhosi konferénsia imprensa konjunta, Vise Reitór III Telkom University, Dida Diah Damayanti, haktuir Telkom University hakarak dezenvolve rekursu umanu ho kualidade ba futuru ho baze ICT, nune’e ho programa estudu saida de’it ho baze ICT no hakarak dezenvolve rekursu umanu ho espíritu empreendedoresmu, alende ne’e hakarak servisu hamutuk kompañia sira ne’ebé bele kapasita timoroan sira.

“Ho Timor-Leste ami hahú iha tinan 2014, halo kolaborasaun ho Telkomcel hodi fó bolsu estudu ba timoroan nain 10 no to’o agora ami iha 200 timoroan ne’ebé rejista ona hodi tuir test ba bolsu estudu”, tenik iha kinta ne’e.

Nune’e nia hatutan Telkom University fó ona bolsu estudu 112 ba Timor-Leste no nain 10 remata ona ho valor ne’ebé di’ak. Agora dadauk fó tan bolsu estudu ba timoroan nain 10 hamutuk ho Telkomcel no Fundu Dezenvolvimentu Kapitál Umanu (FDCH-sigla portugés).

“Ba oin programa ne’e sei nafatin fó bolsu estudu no servisu hamutuk ho universidade iha Timor-Leste nomós ami konvida kompañia estranjeiru no lokál hodi servisu hamutuk Telkom University hodi dezenvolve rekursu umanu”.

Fatin hanesan, Ministru Ensinu Superior, Siensia no Kultura, Longinhos dos Santos, hateten atribuisaun bolsu estudu ne’e importante tebes atu fó biban ba joven sira hodi hetan kualifikasaun ne’ebé di’ak no bele kontribui ba dezenvolvimentu iha rai Timor-Leste.

“Lori Governu Timor-Leste nia naran, Ministru Ensinu Superior, Siensia no Kultura hato’o obrigada wain ba Telkomcel no Telkom University, ne’ebé fó ona oportunidade ba povu Timor-Leste atu hasa’e kapasidade rekursu umanu ba futuru”, dehan.

Nune’e mós governante ne’e agradese ba Telkomcel, ne’ebé alende fó oportunidade ba timoroan hodi eskola, prepara mós kampu traballu ba timoroan, liu-liu ba sira ne’ebé foin remata iha Telkom University.

“Ida ne’e momentu di’ak atu ita hametin relasaun ba povu no nasaun Indonézia no Timor-Leste. Ha’u husu ba ekipa ne’ebé halo selesaun ba programa ne’e ho transparente, justu no rigorozu hodi hetan kualidade ne’ebé di’ak, la’os de’it husi Dili maibé hetan mós reprezentante husi munisípiu seluk”, dehan tan.

Embaixadór Indonézia iha Timor-Leste, Sahat Sitorus, hatutan lori Governu Repúblika Indonézia, nia agradese.

“Agradese ba iniasiativu ida ne’e, hanesan asaun konkreta ne’ebé ami nia Prezidente Indonézia, Joko Widodo, hakarak, la’os de’it halo nota atendimentu barak maibé laiha asaun konkreta. Ida ne’e servisu ne’ebé durante ne’e ami hakarak”, katak.

Parte seluk Diretór Ezekutivu (CEO) Telkomcel, Yogi R. Bahar, hateten importante ba Telkomcel mak oinsá hanesan kompañia ne’ebé halo operasaun iha Timor-Leste bele kontribui iha investimentu sosiál no hasa’e kapasidade timoroan, la’os hanoin servisu no halo investimentu de’it maibé haree hotu oinsá bele kontribui ba nasaun ne’e.

Nia haktuir iha tinan 2014 Telkomcel fó bolsu estudu ho montante $350.000 ba timoroan nain 10, atu bele kontinua ensinu superior diploma no S1 iha Telkom University, no agora dadauk bolseiru nain 10 ne’e fila ona mai ho valor di’ak, balun Telkomcel rekruta ona.

Nune’e mós iha tinan 2016, Telkomcel oferese bolsu estudu ho montante $40.000 ba estudu mestradu, ba funsionáriu Telkomcel nain lima.

“Ami mós konvida kompañia sira ne’ebé iha Timor-Leste hodi hasa’e kapasidade ba timoroan sira, la’os de’it halo investimentu maibé fó buat konkretu ruma ba timoroan”, katak.

Nia akresenta timoroan ne’ebé hetan bolsu estudu, bainhira remata estudu sei rekruta hotu sai funsionáriu Telkomcel, no hakarak iha investimentu iha país ida ne’e, tanba bainhira halo investimentu iha mós kresimentu ekonómiku, la’os de’it iha Dili maibé iha munisípiu seluk.

“Ami sempre hakarak hasa’e kapasidade timoroan, kolabora hamutuk ho Telkom University ba timoroan nain 10. Ida ne’e hanesan ami nia kompromisu atu nafatin dezenvolve país Timor-Leste, ida ne’e mós ho suporta husi Embaixadór Indonézia”, tenik tan.

Fatin hanesan, alumni bolseiru timoroan iha Telkom University, Mario da Silva, haktuir difikuldade bainhira eskola iha Indonézia mak lian, tanba ne’e presiza tempu hodi halo adaptasaun, maibé la’os difísil tanba kultura Indonézia no Timor-Leste ne’ebé kuaze hanesan.

Nia konta momentu eskola iha ne’eba hetan fasilita no hela fatin ne’ebé estratéjiku tebes. “Agradese ba Telkomcel ne’ebé hakarak kapasita timoroan atu hasa’e kualidade rekursu umanu, durante ami eskola buat hotu sira mak oferese no ami so ba eskola de’it, alende ne’e bainhira ami fila sira prepara fatin ba ami hodi servisu iha Telkomcel. Ida ne’e oportunidade di’ak ba ami hodi kontribui nafatin”, tenik.

“Hau nia esperansa ba kompañia sira bele halo saida mak Telkomcel halo, atu suporta juventude ne’ebé karik seidauk hetan oportunidade atu aumenta sira nia koñesimentu”, katak.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here