Diretór Jerál Peska Ministériu Agrikultura no Peska, Acácio Guterres. Imjaen/Espesiál.

DILI, (TATOLI) – Diretór Jerál Peska Ministériu Agrikultura no Peska, Acácio Guterres, hatete Tribunál Distritál Baukau (TDB) hasai ona karta notifikasaun ba kompañia Hong Long atubele hala’o filafali sira-nia atividade, mesmu seidauk iha desizaun finál.

“Foin daudaun iha fulan rua ka tolu liubá mak hasai despaxu husi Tribunál Baukau katak sira (Hong Long) bele hahú fali sira-nia atividade. Ne’e mak altura ne’ebá sira husu ba ministru atu halo lai manutensaun ba ró sira ne’e. Ró sira ne’e bá tiha Xina halo manutesaun no seidauk mai”, Acácio hatete ohin, via telemovel.

Diretór Jerál ne’e relata empreza hakarak atu problema ne’ebé sei iha hela tribunál ne’e tenke rezolve mak hahú fali atividade hafoin desizaun finál husi TDB katak sala ka la’e tanba ne’e mak daudaun ne’e sira hein hela.

“Maibé Tribunál haree katak sira bele halo fali atividade. Desizaun finál seidauk iha, mas Tribunál hasai de’it karta notifikasaun ida katak sira bele komesa atividade depois prosesu ne’e la’o, la’ós para, maibé tribunál fó tempu ba sira para hala’o fali atividade”, katak.

Acácio hatutan daudaun ne’e peska ilegál iha Tasi-Mane barak, tanba sira halo monitorizasaun liuhusi satélite katak husi janeiru to’o agostu ne’e ró ilegál iha 77 resin mak agora peska hela iha tasi.

“Loroloron ró ne’ebá hela to’o fulan-agostu ne’e, ne’ebé desizaun ida uluk ita fó Hong Long ne’e polítika estratéjika ida tanba ita laiha meiu atu kontrola ita-nia tasi, entaun fó lisensa ba sira para halo movimentasaun iha tasi-laran, ró uza bandeira Timor-Leste ne’e entaun tasi ne’e na’in iha no nia vantajen ida mak kompañia hatama reseita ba Governu, maibé ida ne’e para tiha entaun sei hein hela tanba ró ne’e presiza halo manutensaun, ekipamentu ka’er ikan ne’e mós presiza hadi’a, tanba ne’e mak ita hein hela kompañia”.

Nia hatutan la’ós hein de’it Hong Long, maibé empreza seluk bele tama tanba haree bainhira ekonomikamente fó vantajen ba Timor-Leste sei autoriza mós ba kompañia seluk.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here