Ministru Reforma Lejislativa no Asuntu Parlamentár, Fidelis Manuel Leite Magalhães. Foto TATOLI: Egas Cristovão

DÍLI, (TATOLI)-Ministru Reforma Lejislativa, Fidelis Manuel Leite Magalhães perante profisionál komunikasaun sosiál sira, ohin, iha Sentru Formasaun Tibar katak Sekretáriu Estadu Komunikasaun Sosiál (SEKOMS) hamutuk ho ajénsia ne’ebé serbisu ba iha área komunikasaun sosiál hamutuk haree prioridade governu nian ba tinan lima.

Depois haree mós ba tinan 2019 no haree ba iha 2018, inkluzivamente Planeamentu Programa Tinan lima ho Orsamentu Jerál Estadu (OJE) no Planu Asaun Anuál (PAA) 2018.

“Tanba ne’e importante tebes ba governu ida ne’e atu iha programa ida ne’ebé di’ak, atu liga orsamentu ho programa i atu bele mós introduz mekanizmu di’ak liu ba avaliasaun dezempeñu,” hateten ministru Fidelis Magalhães.

“Entaun ida ne’e mak hanesan prioridade ida ba iha Ministériu Reforma Lejislativa i buat ne’ebé mak ministériu hakarak atu iha orsamentasaun no orsamentu ida ne’ebé liga duni ba iha programa i atu iha mós mekanizmu kontrolu ba iha implementasaun husi programa ne’e rasik, ne’ebé di’ak,” reforsa ministru Fidelis Magalhães.

Iha fatin hanesan, Sekretáriu Estadu Komunikasaun Sosiál, Merício Juvinal dos Reis “Akara” informa katak workshop ne’e sei hala’o durante loron rua, hahú ohin no ramata aban, atu hahú diskute, primeiru haree fali programa ba ministériu ka SEKOMS nian, depois hahú ona haree ona alokasaun orsamentu.

Sekretáriu Estadu Komunikasaun Sosiál, Merício Juvinal dos Reis “Akara”. Foto TATOLI: Egas Cristovão

“Ne’ebé, ajenda ida mak ita atu haree programa, prioridade alokasaun ba tinan lima maibé espesifikamente atu prepara orsamentu ba tinan oin. Ita atu deskute para labele hanesan tau de’it osan maibé ita laduun diskute prioridade, planu asaun, oinsa implementa programa, dalaruma iha prosesu laran ita la hatene tuir ita la’o ba ne’ebé,” dehan sekretáriu Estadu Merício Akara.

“Ohin ne’e atu diskute programa, alokasaun orsamentu, prioridade, planu asaun, depois meius atu justifika ita-nia serbisu, to’o ikus ita tenke diskute deadline ruma atu atinji ninia rezultadu. Programa mak sei sai baze ba orsamentu,” sekretáriu estadu ne’e hatutan.

Nia konsidera katak se programa la iha, sei la iha orsamentu, la’ós hanesan tau uluk orsamentu mak ba halo programa. “Iha oitavo governu nian lae, iha orsamentu mak aloka,” subliña sekretáriu estadu ne’e.

Tuir  Sekretáriu Estadu Merício Akarak, depois ne’e hotu mak haree ba planu asaun, ida ne’ebé mak atu ezekuta uluk; iha fulan tolu primeiru, tuir mai no sei observa tutuir para garantia nia rezultadu. Se lae, atividade para atividade, programa para programa, depois tinan ramata la atinji buat ida.

“Entaun, ministériu i sekretáriu estadu komunikasaun sosiál, ninia filozofia mak asaun hotu, atividade hotu, programa hotu, maibé justifika ho rezultadu. Rezultadu mak sei justifika. Ne’ebé loron rua ne’e importante ba sekretáriu estadu komunikasaun sosiál atu deskute kle’an,” Sekretáriu Estadu Merício Akara fó razaun

Sekretáriu Estadu Merício Akara informa mós katak SEKOMS aprezenta ona orsamentu ba iha Parlamentu Nasionál (PN), semana oin hahú deskute.

“Ita aloka ona três ponto oitenta e seis milhões atu ezekuta iha fulan haat nia laran to’o dezembru, ne’ebé alokasaun ida ne’e bazea duni ba nessesidade SEKOMS iha, liliu ba RTTL sei hetan porsaun aas oituan entre um ponto dois ital milhões, trinta e cinco mil ba Ajénsia Tatoli pra hahú ona ninia estrutura,” informa sekretáriu estadu Merício Akara.

“Osan sira ne’e sei ba saláriu vensimentu, ne’ebé i ba rádiu komunidade, funsionáriu SEKOMS hotu. Ne’ebé, hodi bainhira ami iha Parlamentu, sira husu bele ezekuta ka lae? ami dehan bele, tanba ne’e programadu no nesesidade duni,”  konklui sekretáriu estadu Merício Akara hodi haktuir.

Entretantu, ekipa ne’ebé partisipa iha workshop Planeamentu Programa Tinan lima ho Orsamentu Jerál Estadu (OJE) no Planu Asaun Anuál (PAA) 2018 mak ekipa ezekutivu husi Rádiu Televizaun Timor-Leste (RTTL), SEKOMS rasik, prezidente Ajénsia TATOLI, Prezidente TLPU (Timor-Leste Press Union) no entidade relevante sekoms no seluk tan.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here