Primeiru-Ministru (PM), Taur Matan Ruak

DILI, (TATOLI) – Primeiru-Ministru (PM), Taur Matan Ruak, hateten lori kareta roda haat to’o iha Baucau ne’e kondutór profisionál, maibé profisionál liu se lori kareta “roda tolu” to’o iha ne’ebá (Baucau).

“Ha’u hakarak lori kareta roda tolu to’o iha ne’ebá (Baucau)”, Taur haktuir ba jornalista sira iha Palásiu Prezidente Nicolau Lobato, Bairru Pité, kinta ne’e, relasiona ho semana oin diskute ona orsamentu jerál Estadu 2018 iha Parlamentu Nasionál (PN) maibé estrutura Governu seidauk kompletu.

“Laiha buat ida ne’ebé imposível iha mundu, sé ita hakarak to’o iha ne’ebé, lori mate mós ita prontu no rai sei la naben”, akresenta.

Nia dehan Governu atuál hasoru duni difikuldade, maibé dadaun ne’e la’o di’ak loos, tanba Prezidente Repúblika promulga ona Lei Orgániku Governu.

“Prezidente Repúblika apoiu maka’as loos ami nia serbisu, tanba promulga ona Lei Orgánika Governu ho lais loos. Tanba, antes ne’e ami preokupadu loos kuandu lori orsamentu ba Parlamentu depois laiha Lei Orgánika, Parlamentu ko’alia saida ba ami. Ne’e duni, ha’u agradese ba Prezidente Repúblika nia esforsu”, esklarese.

Tuir Xefe-Governu laiha razaun polítika nomós jurídika para halo subtituisaun ba kandidatu membru Governu na’in sia ne’e, tanba ne’e nia kontinua ko’alia ho Prezidente ba kandidatu pendente hirak ne’e.

Kona-ba Prezidente Parlamentu Nasionál nia preokupasaun relasiona ho estrurura Governu seidauk kompletu, Taur hatán estrutura Governu ne’ebé seidauk kompletu ne’e la’ós Parlamentu nia preokupasaun de’it maibé hotu-hotu nian, tanba ne’e hein nia solusaun.

“Labele dehan preokupa, ne’e duni ohin hetan kedas solusaun. Se hanesan ne’e, hetan kle’ur tiha ona”, eis Komandante Gerileiru ne’e realsa.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here