Ministru Reforma Lejislativa, Fidelis Magalhães hamutuk ho SEKOMS, Merício Akara vizita sentru formasaun Tibar. Imajen dokumentasaun

DILI, (TATOLI) – Ministru Reforma Lejislativa no Asuntu Parlamentár, Fidelis Manuel Leite Magalhães, hatete Governu Konstitusionál da-walu ne’ebé lidera husi Primeiru-Ministru, Taur Matan Ruak, sei hasa’e abilidade populasaun nian liuhusi formasaun, atu bele kompete iha nivel nasionál nomós rejionál.

“Aumenta skill (abilidade) ita-nia populasaun nian i impoen haree regra ruma tenke iha katak ema nia nivel vensimentu saláriu ne’e tenke bazea ba nia skill la’ós bazea ba nia pasaporte”, katak ba jornalista sira iha Sentru Formasaun Tibar, ohin, bainhira vizita fatin refere.

Governante ne’e mós akresenta feto sira iha serbisu fatin eh kampu traballu iha tendénsia hetan saláriu ki’ik liu kompara ho traballadór mane.

Tanba ne’e, liuhusi sentru formasaun Tibar, sei treinu timoroan hotu, nune’e bainhira ba serbisu karik, valorizadu iha nivel vensimentu, ne’ebé hetan bazea ba nia abilidade la’ós pasaporte, la’ós bazea ba nia seksu; la’ós tanba feto, la’ós tanba mane, nia hetan boot liu, tanba feto nia hetan menus.

“Ida ne’e objetivu ne’ebé mak ita hotu louva i fiar katak iha tinan lima oin mai, ho serbisu maka’as husi sentru formasaun Tibar nian, Timoroan barak liu, feto ka mane tenke kompete la’ós de’it kompete iha rai laran maibé bele akontese iha ámbitu kontestu rejionál”, garante ministru reforma lejislativa, Fidelis Magalhães.

Konfirma ba TATOLI kona-ba inkluzaun sidadaun timoroan hotu iha prosesu konstrusaun estadu liuhusi komunikasaun sosiál, Ministru Reforma Lejislativa, Fidelis Magalhães, esplika katak komunikasaun ne’e importante.

Importante tanba komunikasaun hanesan elementu ida ba aglutinadór katak halo metin ita-nia nasaun mak liuhusi komunikasaun sosiál, fó informasaun atu promove valór sosiál, valór demokrátiku, valór ita-nia sosiedade nian, atu nune’e hothotu bele sente katak nia pertense, na’in ida ba nasaun no estadu ida ne’e.

“Tanba ita ko’alia kona-ba nasaun ho Estadu, bainhira Estadu ida iha maibé nasaun ida la metin, entaun estadu namlele de’it. Tanba ne’e importante ajénsia sira ne’ebé mak hamutuk ho komunikasaun sosiál atu bele iha komunikasaun, atu bele enkoraja ita-nia sidadaun sira atu sente na’in duni ba estadu ida ne’e, na’in duni ba ukun rasik aan”, afirma.

Espesífiku ba jornalizmu, Ministru Reforma Lejislativa no Asuntu Parlamentár, Fidelis Manuel Leite Magalhães, katak Sekretáriu Estadu Komunikasaun Sosiál (SEKOMS) hamutuk ho ministériu ne’ebé nia lidera, hakarak atividade lubuk, tuir prioridade hanesan hakarak hadi’a servisu RTTL (Rádiu no Televizaun Timor-Leste), liuhusi prestasaun serbisu atu hadi’a imajen no halo imajen di’ak liutan atu sai ajente krédivel no profisionál.

Tuir mai, haree ba kualidade Ajénsia Notisioza Nasionál-TATOLI, ne’ebé agora iha ona nia prezidente, Rosário Martins, ne’ebé tempu badak sei kompleta atu bele hamriik, tanba ajénsia notiosioza TATOLI hanesan odamatan ba informasaun husi Timor-Leste ba mundu.

Seluk, haree ba kontribuisaun SEKOMS nian ba formasaun karakter populasaun nian mak alarga liutan formasaun ba iha munisípiu sira para bele treina timoroan sira, sidadaun timoroan sira ne’ebé mak iha ona lisensiatura atu  bele treina kona-ba jornalizmu para sir abele iha koñesimentu jornalístiku sira atu bele iha kapasidade atu hakerek, iha hanoin ba iha nia área para bele útil iha ita-nia sosiedade no indústria.

Ministru Fidelis Manuel Leite Magalhães konsidera traballadór timoroan diskonfia hetan diskriminasaun tanba traballadór internasionál mai ho pasaporte. Dalaruma mai ho pasaporte, independentemente, traballadór iha abilidade ka lae, ninia nível vensimentu aas liu.

“Husi reforma lejislativa ami rejista i ami hanoin atu oinsa bele hadi’a kuadru, mekanizmu, kuadru legál sira em relasaun ho matéria ida ne’e. Timoroan ida nia manan menus liu maske nia iha skill ne’ebé aas liu. Ida ne’e diskriminasaun ne’ebé aas iha fatifatin”, konsidera governante ne’e.

Diretór Sentru Formasaun Tibar, Simão Barreto, hatete dalan atu ultrapasa situasaun katak traballadór timoroan nia attitude laduun di’ak, tuir konsiderasaun ema balun nian no dúvida seluk tan mak joven tenke iha oportunidade ba formasaun ka treinamentu.

Nune’e ho vizita Ministru Reforma Lejislativa no Asuntu Parlamentár, Fidelis Magalhães no Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, inklui entidade timoroan seluk, diretór Simão Barreto hateten aposta ba joven timoroan sira mak bele hatudu kualidade serbisu.

“Ha’u hanoin atu aposta ba ita-nia joven sira, rekursu umanu ba timoroan sira para iha kualidade di’ak, kapasidade di’ak i fiar aan ida di’ak para depois presta serbisu duni hodi hatudu katak timoroan mós bele hatudu kualidade serbisu iha nia serbisu fatin”, katak.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here