Livros. Foto google

DILI, (TATOLI) – Ministériu Edukasaun (ME), ohin distribui livru matemátika, lian-tetun, istória, manuál ba profesór no seluk tan hamutuk rihun 200 resin ba estudante sestu anu iha  teritóriu Timor-Leste.

“Ohin ita distribui livru hamutuk rihun 200 resin ba munisípiu 12 inklui RAEOA (Rejiaun Administrativa Espesiál Oekusi Ambenu)”, hateten Ministra Edukasaun Juventude no Desportu, Dulce de Jesus Soares, ba jornalista sira iha armajen livru Bebora.

Distribuisaun ne’e akontese hafoin ministériu halo revizaun ba livru hirak ne’e iha 2015.

“Tuir loloos implementasaun fazeadamente iha tinan 2018  ba kintu no sestu anu, maibé la konsege. Tanba ne’e ita halo distribuisaun agora nune’e iha anu letivu foun 2019, estudante no profesór sira iha ona livru ne’e iha sira nia eskola˝, realsa.

Ho distribuisaun ne’e sei fasilita hanorin nain sira no estudante iha prosesu aprendizajen. Governante ne’e afirma prosesu distribuisaun tenke remata molok anu letivu foun 2019.

Governu Austrália liuhosi ninia embaixada iha Timor-Leste maka apoiu orsamentu ba distribuisaun livru ne’e iha teritóriu.

“Distribuisaun livru iha munisípiu Likisa remata ona, agora sei kontinua ba munisípiu seluk˝, haktuir.

Embaixadór Austrália iha Timor-Leste, Peter Roberts, kontente apoiu ministériu edukasaun hodi distribui livru ba estudante sira.

“Ha’u kontente tebes hodi suporta programa ida ne’e hodi halo distribuisaun ba eskola hotu no ha’u interese atu aprende matemátika, tetun no seluk tan”.

Entretantu, imprisaun ne’e gasta orsamentu jerál Estadu iha tinan hirak kotuk.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here