Ró Berlin Nakroma. Imajen Espesiál.

DILI, (TATOLI ) – Ró Berlin Nakroma ne’ebé durante ne’e halo operasaun marítima husi Dili-Atauru-Oekusi hanesan ró úniku be’ebé mak Timor-Leste iha, oras ne’e laiha ró substitui bainhira halo manutensaun iha rai liur, tanba ne’e governu liuhosi Ministériu Transporte no Komunikasaun (MTK) kompromete atu prosesa Ró Berlin Nakroma II.

“Iha futuru ita iha planu oinsá mak bele arranja tan ró ruma, oras ne’e dadauk governu liuhosi Ministériu Transporte no Komunikasaun iha kompromisu atu kontinua prosesa ró Berlin Nakroma II”, tenik Ministru José Agostinho Da Silva, foin lalais ne’e iha audiénsia públika ba apresiasaun Orsamentu Jerál Estadu (OJE) 2018 iha Parlamentu Nasionál.

Hodi haktuir foin dadauk Ró Berlin Nakroma halo annual docking iha Semarang (Indonézia) no governu tenke gasta osan ba ró ida hodi substitui ho montante $400.000 ba fulan rua, la inklui ba ró seluk.

Nia dehan tan bainhira Ró Haksolok ne’ebé oras ne’e sai polémika marka prezensa, sei la preukupa ho substituisaun.

“Ministériu Transporte no Komunikasaun iha kompromisu atu hatúr polítika di’ak, atu haree asuntu ne’e iha tempu tuir mai. Karik kria kondisaun iha rai laran hodi bainhira atu halo annual docking lalika ba liur, nune’e bele halo poupansa ba gastu no bele investe fali iha setór produtivu sira seluk”, dehan tan.

Governante ne’e haktuir durante fulan rua Ró Berlin Nakroma ne’ebé mak kada tinan tuir lei SOLAS obrigatóriamente tenke halo annual docking, ho objetivu garante seguransa ba passajeiru sira, enkuantu gastu ba manutensaun ne’e hamutuk $270.000, ne’ebé foti husi fundu kontijénsia VII Governu Konstitusionál nian no husi orsamentu Autoridade Portuáriu Timor-Leste (APORTIL).

Nia esplika, totál orsamentu ne’e uza atu selu ba komponente manutensaun fízika ró, sosa spare part, emisaun dokumentu no sertifikadu.

“Pagamentu halo ona pursentu 40 no fulan ne’e sei selu tan pursentu 60, entaun sei iha obrigasaun pursentu 50 para ita bele selu ba kompañia ne’ebé mak halo manutensaun ba ró ne’e, pursentu 10 husi retensaun hodi garante ba fulan tolu”, nia esplika tan.

Nune’e mós, MTK liuhosi diresaun indireta APORTIL oras ne’e dadauk prosesu hela fatin (Ferry Terminal) ba passajeiru Ró Berlin Nakroma iha Portu Dili

“Projetu ida ne’e hetan apóiu husi povu no Governu Japaun, ne’ebé mak oras ne’e dadauk atinji ona pursentu 35, ita hein katak atividade ne’e bele aselera no oinsá bele finaliza atu fó atendimentu ne’ebé mak dignu ba passajeiru sira”, katak.

Nia rekoñese situasaun agora bainhira passajeiru sira halo deslokasaun, engarrafamentu bele to’o estrada, tanba ne’e mak governu halo esforsu atu bele aselera Ferry Terminal.

Nia mós informa tan oras ne’e dadauk prosesu dezenvolvimentu infraestrutura Portu Tibar la’o hela.

“Espera katak ba oin bainhira Portu ne’e finaliza ona ninia konstrusaun, atividade esportasaun no importasaun sei sentraliza iha Portu Tibar, enkuantu Portu Dili, fó atendimentu ba passajeiru para labele iha engarrafamentu”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here