pasajeiru pur volta 2000 resin vizita Timor-Leste ho Ró Pacific Aria.

DILI (TATOLI)-Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, fó hanoin katak, Governu Timor-Leste (TL) presiza haree ona regulamentasaun oinsá para kontrola kruzeiru ho ró kontentór sira tanba tratamentu lahanesan.

“Tenke haree kondisaun, ministériu relevante tenke serbisu hamutuk para ita haree oinsá, tanba merkadu ba kruzeiru ne’e mós importante ba Timor-Leste no Governu presiza haree ona regulamentasaun oinsá para kontrola tanba kruzeiru ho ró kontentór sira ne’e tratamentu lahanesan”, Quintas afirma ohin, iha Portu Dili.

Nia dehan, ró kruzeiru komesa mai beibeik ona, maibé Governu mós tenke responde ona hodi haree ba infraestrutura bázika sira no halo regulamentasaun oinsá atu kontrola kruzeiru ne’e.

Basa ró kruzeiru ne’ebé mai ne’e mós nia impaktu boot lahalimar, bainhira lá kontrola ho di’ak maka impaktu ba ambiente iha tasi-laran.

“Ró kruzeiru ne’e nia konsome bee ne’e boot, entaun Governu presiza haree. Bá oin liuliu ministériu relevante sira tuur hamutuk para ita tenta dezenvolve turizmu ida sustentável. Turizmu sustentável ita haree dimensaun tolu ne’ebé importante aspetu ekonomia, sósiu-kulturál nó mós ambientál”, nia esplika.

Quintas akresenta daudaun ne’e sei foka liu ba ekonomia, maibé tenta ba longu prazu nian komesa haree ona ba impaktu sósiu-kulturál  no ambientál para mantein riku-soin tasi-laran mós prezerva nafatin.

Atu prezerva dala ida mak regula ró kruzeiru ne’e, oinsá para ita halo tratamentu ida ba sira bazeia ba regulamentasaun ne’ebé iha. Ezemplu ró tama ne’e ita kontrola oinsá.

Tanba ida ne’e ba futuru liuliu iha Governu foun ida ne’e komesa haree ona para iha tempu badak Timor iha ona regulamentasaun.

Bainhira la iha regumentasaun tuir Diretór Jerál ne’e sei mosu mosu risku boot ruma. Hanesan ezemplu ida iha nasaun viziña Indonézia iha Raja Empat ne’ebé ró ida mai estraga ahu-ruin kuaze ektare ida. Ne’e signifika ladi’ak tanba ahu-ruin ne’e mak sai fatin ida ne’ebé di’ak ba ita-nia Ikan boot sira.

Entretantu ohin ró kruzeiru Pacific Aria ne’ebé tula pasajeiru kuaze 2000 resin mai vizita Timor-Leste no ema na’in-1290 tun hodi la’o paseiu iha Dili, Likisá no Ermera hodi vizita fatin turístiku sira, merkadu Tais no empreza Kafé nian, Timor Global.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here