Seremónia inaugurasaun Ponte Noefefan, Imajen Ajénsia TATOLI/Xisto Freitas

OE-CUSSE (TATOLI) –Povu Oe-Cusse liuhosi movimentu sidadania afirma sei fó apoiu Prezidente Repúblika, ho inkondisionamente hodi bele tetu no foti desizaun ba lista membru governu ne’ebé sei pendente tuir kompeténsia Xefe Estadu nian, ne’ebe define ona iha Konstituisaun RDTL.

Tanba ida ne’e, husu ba Primeiru Ministru governu da-8 nian, atu substitui kandidatu na’in sia ne’ebé sei pendente, nune’e bele kompleta ona estrutura governu da-8.

“Ami husu ba Primeiru Ministru atu bele troka ka substitui naran hirak ne’ebé Prezidente RDTL la aseita tanba deskonfia komete korrupsaun,” Porta Vóz Movimentu Sidadania Oe-Cusse Timor-Leste, Luis Armando Pina ne’ebé reprezenta feto faluk, oan kiak FALINTIL RAEOA deklara, iha Oe-Cusse, ohin.

Tuir sidadaun Oe-Cusse Prezidente Repúblika la aseita kandidatu hirak ne’ebé sei pendente tanba deskonfia sira komete ona korrupsaun, no hatán ona iha Komisaun Anti Korrupsaun (CAC-Sigla Portugés) no Ministériu Públiku.

Maski nune’e tanba razaun segredu justisa bazeia ba kódigu prosesu penál Artigu 74, ne’e duni naran hirak ne’e labele fó sai ba públiku hosi autór justisa sira bainhira seidauk iha desizaun hosi tribunál.

Kona-bá nomeasaun tuir sira (povu Oe-cusse) nia hatene iha Artigu 106, iha alínea daruak esplika, membru governu sira seluk, Prezidente Repúblika mak sei hili liuhosi Xefe Governu nia proposta.

Nune’e mós iha Artigu 86, alínea H hateten katak foti, fó posse no hasai membru governu nian, tuir proposta Primeiru Ministru nian.

Bazeia ba ida ne’e Porta Vóz husu ba povu Oe-Cusse atu labele rona tuir informasaun falsu sira hosi grupu ka individuu nian, maibé hametin nafatin pás no estabilidade iha rai laran, atu nune’e dezenvolvimentu bele la’o nafatin.

Too notísia ne’e tuun parte TATOLI seidauk halo konfirmasaun ba Primeiru Ministru, Taur Matan Ruak.

Jornalista: Zezito Silva

Editór : Manuel Pinto

1 KOMENTÁRIU

  1. Bomdia sr/a. Noticias ne’ebe publika iha situ ida ne’e di’ak los maibe presiza halo atualizasaun (update) kada loron. Tamba tuir hau nia vizualizasaun katak noticias balun ne’ebe antigamente sei ejisti nafatin iha pajina ne’e nia laran. Obrigado!

HAKEREK NO HATÁN

Please enter your comment!
Please enter your name here