Eis Sekretáriu Jerál ONU, Kofi Anan. Foto espesiál

DILI,(TATOLI) – Ministru Estadu Prezidénsia Konsellu Ministru (KM), Agio Pereira, haktuir reuniaun estraordináriu Konsellu Ministru halo ona rezolusaun ida hodi nomea Kay Rala Xanana Gusmão hodi reprezenta Estadu Timor-Leste (TL) ba asiste serimónia funebre Eis-Sekretáriu Jerál ONU, Kofi Annan.

“Reuniuan estraordináriu Konsellu Ministru halo ona rezolusaun ida konsidera hodi nomea Kay Rala Xanana Gusmão reprezenta ita nia nasaun ba serimónia hakoi, Eis-Sekretáriu Jerál ONU, Kofi Annan, nu’udar belun boot povu no nasaun nian”, Agio Pereira ba jornalista sira iha Palásiu Governu hafoin enkontru estraordináriu KM, ohin.

KM antesipa ona katak maun boot Xanana Gusmão mak sei reprezenta Estadu Timor-Leste ba serimónia funerál ba belun boot Kofi Annan ne’ebé mate iha sábadu foin lais ne’e iha Hospital de Berna, iha Suíça ho idade 80.

“Maun boot Xanana Gusmão kuandu aranka ona, depende ba serimónia funerál nian”, katak tan.

Eis-Sekretariu Jerál ONU, Kofi Annan, moris iha Kumasi, atuál Gana, iha 8 abril 1938. Kofi Annan sai Sekretáriu Jerál ONU hosi 1997 to’o 2006 no mate iha sábadu, 18/08, ho idade 80.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here