Xefe Kaza Militár Prezidénsia Repúblika, Koronél António da Silva “Maucalo”

DILI, (TATOLI) – Membru Konsellu Superiór Defeza no Seguransa (KSDS), tersa ne’e hala’o reuniaun hodi diskute nomeasaun Vise Xefe Estadu Maior Jenerál  FALINTIL-Forsa Defeza Timor-Leste (F-FDTL).

Tuir lei bainhira Prezidente Repúblika atu halo nomeasaun ba Xefe Estadu Maior Jenerál ka Vise Xefe Estadu Maior Jenerál, tenke konsulta uluk membru KSDS, maibé desizaun ikus sei entrega fali ba Prezidente Repúblika atu deside.

“Membru KSDS-sira konkorda tebes katak presizamente tenke iha Vise Xefe Estadu Maior Jenerál ida para bele ajuda Xefe Estadu Maior Jenerál  hodi hala’o funsaun administrasaun forsa armada nian liu-liu iha área justisa no disiplina, tanba ho ezonerasaun Vise Xefe Estadu Maior Jenerál uluk, Filomeno da Paixão de Jesus, fatin ne’e vaziu (mamuk) hela”, katak Xefe Kaza Militár Prezidénsia Repúblika, Koronél António da Silva Maucalo, ba jornalista sira iha Palásiu Prezidente Nicolau Lobato, Bairru Pité.

Maucalo esplika konstuisaun artigu 86 define proposta nomeasaun mai hosi Governu, tanba ne’e Governu prepara ona kandidatu na’in rua hanesan Brigadeiru Jenerál Sabica Besi Kulit no Falur Rate Laek, iha ne’ebé Xefe Estadu sei nomea iha tempu badak.

Entretantu iha reuniaun ne’e Prezidente Repúblika mós fó tomada pose ba membru KSDS na’in rua maka hanesan José Manuel Nakfilak subtitui Cornélio Gama (L7) ne’ebé oras ne’e sai ona deputadu nomós Ministru Defeza, Filomeno da Paixão de Jesus.

Aleinde ne’e, KSDS mós halo aprovasaun ba akta reuniaun anteriór nian liu-liu ba ezonerasaun Vise Xefe Estadu Maior Jenerál, Filomeno da Paixão de Jesus.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here