Diretór Jerál Estatistika Ministériu Finansas, Elias dos Santos Ferreira. Imajen/MF.

DILI, (TATOLI) – Diresaun Jerál Estatístika Ministériu Finansas (MF) lansa ona Índise Presu Konsumidór (IPK) jullu 2018 ne’ebé hatudu katak iha inflasaun porsentu 0.1 bainhira kompara ho juñu iha deflasaun porsentu -0.1.

Diretór Jerál Estatístika, Elias dos Santos Ferreira, hatete inflasaun (presu sa’e) ne’e afeta tanba hetan kontribuisaun maioria husi grupu alkol no tabaku iha pursentu 1.4.

“Ita hatene katak tabaku importa husi Indonézia, Governu Indonézia rasik tau taxa ne’ebé boot, entaun ida ne’e afeta mós ba ita Timor-Leste”, Elias afirma ohin, iha Kaikoli hafoin lansamentu IPK ne’e.

Nia hatutan bainhira haree ba foos iha inflasaun pursentu 0.1 no ida ne’e indika katak iha juñu no jullu Timor-Leste halo kolleta ba hare, enkuantu modo-tahan hetan deflasaun pursentu 0.9, tanba daudaun ne’e mós halo kolleta, nune’e afeta presu tun.

Pesoál IPK Diresaun Jerál Estatístika, Fernão M. Trindade, dehan inflasaun grupu hotu iha jullu sa’e ne’ebé afeta husi akol no tabaku pursentu 1.4 ne’ebé kontribui husi sub-grupu tabaku pursentu 0.1, tanba iha supermerkadu sigarru folin sa’e.

“Grupu transporte sa’e iha pursentu 0.9 ne’ebé kontribui husi sub-grupu mina transporte iha jullu nia laran pursentu 0.1 (presu mina mundiál sa’e pursentu 11 iha períodu  2018 hodi afeta ba presu mina transporte rai-laran). Grupu uma mós afeta ba inflasaun ne’ebé sa’e pursentu 0.2 no hahán no bebida la’ós alkólika ne’ebé hetan mudansa kontráriu mak iha deflasaun -0.1%”.

Iha hahán no bebida la’ós alkólika hetan redusaun, tanba afeta maioria husi sub-grupu vejetál no hetan presu mudansa kontráriu iha hahán no bebida la’ós alkólika mak na’an pursentu 1.2, foos pursentu 0.1 (presu foos sa’e tanba afeta husi folin foos importasaun ne’ebé hatudu presu foos mundiál sa’e pursentu 10 durante 2018).

Mudansa persentajen IPK anuál sa’e pursentu 2.5 kompara jullu 2018 no 2017, ne’ebé kontribui husi grupu hahán no bebida la’ós alkólika pursentu 1.6, alkol no tabaku pursentu 10.5, edukasaun pursentu 16.6, transporte pursentu 3.9, uma pursentu 1.3, roupa no sapatu pursentu 0.7 no ekipamentu no manutensaun mobiliáriu uma-laran pursentu 0.5. Grupu rekreasaun no kultura hetan deflasaun -1.3%.

Inflasaun tradeable (hanesan mudansa presu produtu hotu ne’ebé iha dependénsia maka’as ba kompetisaun merkadu internasionál) laiha mudansa (pursentu 0.0) no non-tradeable (hanesan mudansa presu produtu hotu ne’ebé iha dependénsia ba fatór merkadu doméstiku) sa’e pursentu 0.1 ba mensál kompara jullu 2018-juñu 2018.  Inflasaun tradeable no non-tradeable sa’e pursentu 1.6 iha anuál kompra jullu 2018-jullu 2017.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here