Primeiru-Ministru, Taur Matan Ruak, hetan vizita husi Xefe Estadu Maior Jenerál Forsa Armada Portugal, Almirante António Silva Ribeiro, iha Palasiu Governu, Tersa (21/8). Imajen GPM

DILI, (TATOLI) – Xefe Estadu Maior Jenerál Forsa Armada Portugal, Almirante António Silva Ribeiro, informa nia vizita ba Primeiru-Ministru (PM), Taur Matan Ruak, katak hakarak ko’alia kolaborasaun Forsa Armada Portugal no FALINTIL-Forsa Defeza Timor-Leste (F-FDTL).

“Ha’u mai vizita Primeiru-Ministru hanesan ema ne’ebé ha’u koñese tinan barak ona, hanoin hikas tempu ne’ebé ami elabora hamutuk nomós ko’alia konaba futuru, liu-liu apoiu no kolaborasaun entre Forsa Armada Portugal no F-FDTL”, tenik ba jornalista sira hafoin hasoru malu ho Xefe Governu iha Palásiu Governu, tersa (21/8).

Nia hatutan konteksu ne’e sira troka hanoin saida mak possibilidade entre Forsa Armada Timor-Leste no Portugal.

“Biban ne’e ha’u iha oportunidade hato’o ba Primeiru-Ministru, saida mak forsa armada portugés bele halo projetu no nesesidade F-FDTL, ami analiza possibilidade atu profunda ami nia kooperasaun”, dehan tan.

Nune’e mós nia hato’o ba PM, satisfasaun boot ne’ebé nia haree kona-ba progressu husi komponente naval, sentru formasaun iha Metinaru, komponente apoiu servisu iha Metinaru ne’ebé nia vizita ona tinan hirak liuba no foin mak ba vizita fali.

“Ha’u haree progressu boot, iha termu sira nia kapasidade, organizasaun nomós kompeténsia ne’ebé hatudu husi ema ne’ebé iha oportunidade”, katak.

Tuir nia ne’e hanesan motivu no satisfasaun boot ba sira hotu, tanba progresu ne’e rezulta liña dahuluk husi objetivu ne’ebé define ona husi autoridade timoroan, nune’e mos ho kontribuisaun balun husi kooperasaun esterna Timor-Leste.

“Ha’u sente orgullu ho servisu kooperasaun husi  militár portugés sira iha Timor-Leste ne’ebé fó apoiu F-FDTL”, akresenta.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here