Kareta lima ne’ebé mak governu Xina oferese ba TL. Foto TATOLI: Rafy Belo

DÍLI, (TATOLI)-Repúblika Populár Xina oferese karreta ho marka avanza kór metan lima ba Timor-Leste, liliu Ministériu Negósiu Estranjeiru no Kooperasaun (MNEK) hodi hala’o serbisu.

Karreta lima ne’e oferese husi reprezentante embaixadór Xina, enkaregadu negósiu no konselleiru polítiku embaixada Xina, Li Fanzie, ba MNEK, iha sesta fim-de-semana ne’e, iha salaun diplomata, MNEK, Praia dos Coqueiros-Díli.

“Xina oferese kareta lima, hodi fasilita liutan servisu diplomátiku, ita-nia funsionáriu públiku sira-nia serbisu,” informa diretór jerál interinu, asuntu bilaterál, MNEK, Francisco Dionísio Fernandes ba jornalista sira hafoin serimónia entrega no simu kareta sira ne’e.

Diretór jerál interinu, Francisco Dionísio haktuir katak iha 16 maiu 2016 ho vizita ministru Xina nian, konvida husi ita-nia governu. Iha vizita fraternidade ida ne’e Xina anunsiu donasaun ba ita, atu apoiu institutu treinamentu diplomátiku ho osan dolár rihun atus ida, hodi sosa kareta, hodi fasilita liutan MNEK nia serbisu.

Diretór Francisco Dionísio haktuir mós katak Xina anunsia donasaun iha 2016 hodi fó osan, depois MNEK haree ba prioridade, tuir planu ne’ebé iha ona. Osan sufisiente ba hola kareta. “Konserteza Ministériu Negósiu Estranjeiru halo uluk aprovizionamentu, selesiona kompania ida ne’ebé mak oferese di’ak liu, folin di’ak liu,” dehan diretór jerál interinu ne’e.

Diretór ne’e informa katak ita-nia relasaun no kooperasaun bilaterál ho Xina dezde kedas restaurasaun ita-nia indepedénsia, 20 mai 2002.

“Xina nia apoiu konserteza apoiu  ita-nia Planu Estratéjiku Dezenvolvimentu, liliu apoiu ne’ebé liga ho ita-nia planu. Ita hatene katak apoiu la’ós foin kareta lima ne’e; apoiu ita-nia infrastrutura hanesan harii Palásiu Prezidente, Ministériu Negósiu Estranjeiru, Ministériu Defeza nomós iha apoiu kooperasaun téknika, iha área agrikultura, edukasaun nomós saúde,” hateten diretór Francisco Dionísio.

Reprezentante embaixadór Xina, Li Fanzie, liuhusi diskursu hateten katak sira kontente tebes hodi oferese viatura sira ne’e no espera katak bele ajuda Timor-Leste, liliu MNEK.

“Ne’e hanesan fraternidade entre povu rua, rai rua (Xina no Timor-Leste-red), konserteza ministériu rai rua (MNEK),” dehan konselleiru polítiku, Li Fanzie.

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here