Prezidente Repúblika, Francisco Guterres Lú Olo, pasa revista ba formatura membru F-FDTL bainhira komemora loron FALINTIL ba dala 43 iha Kuartel Jenerál F-FDTL, Fatuhada. Foto António Gonçalves

DILI, (TATOLI) – Prezidente Repúblika, Francisco Guterres Lú Olo, rekomenda ba Estadu Timor-Leste haree oinsá prezerva memória-sira luta ba libertasaun nasionál.

“Ita tenke haree oinsá grava lalais ida-idak ninia istória, atu loron ruma bele halo filme no livru kona-ba ita-nia istória. Ita bele halibur hamutuk istória FALINTIL ida, ne’ebé timoroan rasik mak halo, harii hosi lia loos ho interpretasaun no perspetiva hosi fundadór no autór funu nian”, Xefe Estadu hato’o asuntu ne’e liuhusi ninia intervensaun iha aniversáriu FALINTIL ba dala 43 ne’ebé hala’o iha Kuartél Jenerál F-FDTL, Fatuhada, segunda ne’e.

Hosi istória eis membru Frente Armada ida-idak, tuir Lú Olo sei hakle’an istória FALINTIL nian ne’ebé halo hamutuk ho povu no nia hein katak instituisaun relevante sira sei halo ida ne’e molok fundadór no eis kombatente sira haluha ka mate.

Iha biban ida ne’e, Prezidente Repúblika mós hatutan enkuantu seidauk harii Konsellu Kombatentes Libertasaun Nasional, husu ba autoridade no asosiasaun relevante-sira atu harii lalais ekipa ida ka liu, ne’ebé sei haree liu-liu ba oinsá valoriza eis FALINTIL sira ne’ebé ohin loron dirije F-FDTL no iha tempu badak tenke husik vida militár.

“Ohin, ha’u hakarak husik hela hanoin foun ida ne’e ba maluk sira hotu. Jurista-sira hosi instituisaun relevante bele hahú haree oinsá ita harii Konsellu Estratéjiku Militár ida atu halibur kuadru superiór F-FDTL sira ne’ebé sei husik vida militár, iha tempu badak, tanba idade ka razaun seluk”, tenik.

Nune’e mós, Lú Olo hatutan tan implementa lalais programas reinsersaun sosiál ba eis membru FALINTIL no eis F-FDTL sira (desmobiliza iha tinan 2011 no 2015) ne’ebé sei iha kbi’it atu hadi‘a sira-nia moris no família nian.

Nia salienta presiza harii mós unidade espesiál ida iha ospitál munisípiu hotu-hotu (hanesan ida ne’ebé harii iha Ospitál Nasionál Guido Valadares, hosi eis-Primeiru Ministru, dr. Rui Maria de Araújo) hodi tau matan ba veteranu no kombatente-sira libertasaun nasionál no sira-nia família.

Nia rekomenda tan harii lalais mós ekipa ki’ik ida iha munisípiu ida-idak ne’ebé iha kbi’it atu organiza programa selebrasaun aniversáriu FALINTIL no halo levantamentu dadus loloos eis kombatente-sira nian hodi hato’o mós proposta kona-ba projetu buka moris di’ak ho kbi’it rasik no oinsá Estadu fó apoiu ba projetu sira ne’e, atu bele fó kbi’it liu-tan.

Aleinde ne’e, aselera mapeamentu ba fatin istóriku iha Timor-Leste tomak, hanesan Institutu CHEGA halo ona mapeamentu Dili nian, maibé Governu presiza habelar serbisu ida ne’e iha munisípiu sira seluk atu haburas lalais Turizmu Istóriku, ho hanoin katak Turizmu Istóriku sei sai fonte rendimentu boot ba Timor-Leste.

“Ha’u husu VIII Governu atu fó atensaun espesiál ba CHEGA iha orsamentu tuir mai nomós ba inisiativa lokál sira hanesan halo dadaun iha fatin Watulana/Ossú”, afirma tan.

Ikus liu, nia husu ba instituisaun relevante sira, atu haree oinsá hala’o programa Serbisu Síviku Nasionál, ne’ebé nu’udar idéia ida hosi eis Prezidente Repúblika, Taur Matan Ruak, tanba ideia ida ne’e importante tebes oinsá foin-sa’e sira bele apriende sentidu ierárkia, espíritu disiplina, badinas, domin no defende interesses povu no Estadu nian.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here