Prezidente Repúblika, Francisco Guterres Lú Olo. Foto António Goncalves

DILI, (TATOLI) – Prezidente Repúblika (PR), Francisco Guterres Lú Olo, la bolu situasaun inserteja iha rai laran nu’udar impase maibé dezafiu.

“Balun bolu krize, balun bolu impase. Ha’u hili bolu dezafiu. Liafuan dezafiu ezije espíritu kriativu”, Lú Olo hato’o liuhusi ninia deskursu iha serimónia aniversáriu FALINTIL ba dala 43 ne’ebé hala’o iha Kuartél Jenerál F-FDTL, Fatuhada, segunda ne’e.

Dezafiu foun ida ne’e, tuir Xefe-Estadu ezije líder-sira nia kapasidade no matenek, liuhusi diálogu, ko’alia oin ba oin, ho laran nakloke, vontade atu hetan solusaun di’ak liu ba povu no nasaun.

“Nu’udar Prezidente Repúblika ha’u buka ko’alia nafatin ho Primeiru-Ministru atu haree oinsá garante governasaun di‘ak iha ninia mandatu tinan lima. Ida ne’e ha’u-nia obrigasaun nu’udar Prezidente Repúblika, tuir Konstituisaun haruka”, afirma.

Nia hatutan ho primeiru-ministru halo hela diálogu ba kestaun nomeasaun kandidatu membru Governu na’in sia ne’ebé pendente ho ulun malirin no respeitu ba ida-idak ninia kompeténsia ne’ebé hatúr momoos iha lei inan. 

Jornalita: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here