DILI, (TATOLI)-Grupu KADALAK “Sai Ida Suli Hamutuk” hamosu iniasitiva hodi sunu lilin atus ida (100) hodi fó omenajen ba saudozu sekretáriu jerál Nasaun Unida sesante, Kofi Annan-belun boot Timor-Leste, nia kontribuisaun ba Timor-Leste.

“Motivu husi sunu lilin ne’e mak haree liubá Kofi Annan nia kontribuisaun ba Timor-Leste nia prosesu ukun aan no restaurasaun indepedénsia no prepara Timor-Leste sai nasaun ida hanesan nasaun seluk forte no boot tebes,” informa prezidente KADALAK, Natalino de Jesus Dias ba Ajénsia TATOLI, ohin, iha nia kna’ar fatin, Kampus ICR, Lahane-Díli.

Tuir Prezidente Natalino, lilin 100 la’ós fó de’it omenajen maibé hanesan mós sinál agradesimentu ida ba matebian, husi timoroan hotu, ne’ebé konsege serbisu ho no hansan lembransa hodi fanun hikas jerasaun foun ne’ebé seidauk hatene saudozu. “Nu’udar timoroan no jerasaun foun, ita fanun malu,” subliña prezidente KADALAK.

Dosente ICR (Instituto Ciência Religiosa) ne’e konsidera katak Timor-Leste, ohin loron, bele sai hanesan ne’e tanba mós sakrifísiu, dedikasaun saudozu nian.

“Jerasaun timoroan iha dever atu fó omenajen ba señor ne’e (Kofi Annan). Ami KADALAK hanoin, solidariedade nu’udar umanu, labele sai hanesan diskursu de’it maibé tenke konkretiza iha moris lorloron nian, liliu ba ema sira ne’ebé mak la sura kolen ba rai Timor. Ita sura labele no deskreve la hetan,” informa prezidente KADALAK, Natalino de Jesus Dias.

KADALAK mós hanoin no konsidera katak omenajen ne’e halo la’ós haree ba nia figura iha kualidade nu’udar sekretáriu jerál Organizasaun Nasaun Unida (ONU) sesante maibé tanba mós nia luta hasoru diskrimisaun, liliu diskriminasaun rasiál. Nia lutadór ka luta na’in ba diskriminasaun ba rasa, relijiaun nomós seluk tan.

“Nia ezemplu, presiza ita banati tuir. Konvida timoroan hotu” sujere prezidente KADALAK, Natalino de Jesus Dias.

Atividade sunu lilin atus ida ne’e, sei hala’o iha Ministériu Negósiu Estranjeiru no Kooperasaun (MNEK), Praia dos Coqueiros, Díli, orsida tuku neen lorokraik ho balun (14h30 Oras Timor-Leste-OTL).

Biografia Saudozu Kofi Annan

 Naran Kumpletu      : Kofi Atta Annan

Fatin no data moris : Commassie, Ghana, 08 abril 1938

Oan husi                 : Victoria ho Henry Reginald

Kaben                    : Nane Maria Annan husi Suésia

Oan sira                 : Kojo, Ama, Nina

Almamater              :

Universidade Kwame Nkrumah, Macalester College, graduadu iha Institute of International and Development Studies, Institute Technology  massasuche

Durante nia moris, saudozu Kofi Anna asume tiha ona kna’ar importante oioin to’o hakotu iis. Saudozu Kofi Annan hakotu iis ho idade walu nolu. Sentidu kondolénsia ba família enlutada!

Jornalista: Rafy Belo

Editór : Manuel Pinto

HAKEREK NO HATÁN

Please enter your comment!
Please enter your name here